ირანის პრეზიდენტი: ტრამპმა უნდა იცოდეს, რომ სანქციების, გაზრდილი ზეწოლისა და ძალადობის ფონზე ირანელი ხალხის წინააღმდეგობა მხოლოდ გაძლიერდება

ირანი არასდროს დაიჩოქებს, - განაცხადა ირანის პრეზიდენტმა, მასუდ პეზეშკიანმა გაეროს გენერალურ ასამბლეაზე სიტყვით გამოსვლისას და სხვა ქვეყნებს მოუწოდა თანამშრომლობისკენ „ჭეშმარიტი მშვიდობისა და სტაბილურობის“ მისაღწევად იმ მოვლენების ფონზე, რასაც მან „ჩაგვრა და ძალადობა“ უწოდა.

ირანის ლიდერმა აღნიშნა, რომ ტრამპმა „უნდა იცოდეს, რომ სანქციების, გაზრდილი ზეწოლისა და ძალადობის ფონზე ირანელი ხალხის წინააღმდეგობა მხოლოდ გაძლიერდება“.

პეზეშკიანის თქმით, „ძალის გარეშე არსებული სამყარო სახიფათოა, თუმცა სამყარო, რომელსაც მხოლოდ ომისა და ჩაგვრის ენა ესმის, უსაფრთხო ვერ იქნება“.

„ჩვენ არ უნდა ავაშენოთ სამყარო, სადაც სამხედრო ძალა ჩაანაცვლებს ლეგიტიმურობას, ტერორიზმი ჩაანაცვლებს პოლიტიკასა და მოლაპარაკებებს, ხოლო ომი - დიალოგსა და დიპლომატიას“, - განუცხადა მან მსოფლიო ლიდერებს.

პეზეშკიანმა მსოფლიოს ქვეყნებს მშვიდობის მისაღწევად ერთობლივი მუშაობისკენ მოუწოდა.

„ჩვენ მოვუწოდებთ მსოფლიოს თანამშრომლობისა და კოლაბორაციისკენ არა სისუსტის გამო, არამედ საკუთარ ძალასა და სიმტკიცეში ღრმა რწმენის გამო - იმ ღრმა რწმენის გამო, რომ ამ რეგიონში ცალკეულად უსაფრთხოება არავის ექნება“, - განაცხადა მან.

„ან ერთად ავაშენებთ მას, ან ერთად მოგვიწევს უსაფრთხოების არარსებობის პირობებში ცხოვრება. ჩვენ ვცდილობთ ვიფიქროთ ღირსეულ მომავალზე, სადაც უსაფრთხოება, სამართლიანობა, მიუკერძოებლობა და ადამიანის ღირსება გახდება განუყოფელი უფლება ყველა ადამიანისთვის“, - დასძინა მან.