„მსოფლიო ხუთზე მეტია“ - ერდოღანი გაეროს უშიშროების საბჭოს რეფორმირებას ითხოვს

გაეროს გენერალურ ასამბლეაზე სიტყვით გამოსვლისას, თურქეთის პრეზიდენტმა, რეჯეფ თაიფ ერდოღანმა გაეროს უშიშროების საბჭოს სტრუქტურის შეცვლის შესახებ თავისი მრავალწლიანი მოთხოვნა კიდევ ერთხელ გააჟღერა.

მისი განცხადებით, არსებული სისტემა პროპორციულზე ბევრად დიდ ძალაუფლებას ანიჭებს ორგანოს ხუთ მუდმივ წევრს.

„სისტემა, სადაც 190-ზე მეტი ქვეყნის ნება ხუთი სახელმწიფოს პრეტენზიებზეა დამოკიდებული, არც სამართლიანია და არც სანდო“, - განაცხადა ერდოღანმა.

თურქეთის პრეზიდენტის განცხადებით, საერთაშორისო უსაფრთხოების არქიტექტურა უნდა გარდაიქმნას პრინციპით - „მსოფლიო ხუთზე მეტია“, რაც მიანიშნებს აშშ-ის, ჩინეთის, რუსეთის, საფრანგეთისა და დიდი ბრიტანეთის მიერ ვეტოს უფლებისა და მუდმივი სტატუსის მონოპოლიზებაზე.