გაეროს გენერალურ ასამბლეაზე სიტყვით გამოსვლისას, მაკრონმა მსოფლიოში „ჯუნგლების კანონის“ შესაძლო დაბრუნების საფრთხეზე ისაუბრა და საერთაშორისო თანამეგობრობას მოუწოდა, „მტკიცედ იდგნენ გაერთიანებული ერების ორგანიზაციის გვერდით“

გაეროს გენერალურ ასამბლეაზე სიტყვით გამოსვლისას, საფრანგეთის პრეზიდენტმა, ემანუელ მაკრონმა მსოფლიოში „ჯუნგლების კანონის“ შესაძლო დაბრუნების საფრთხეზე ისაუბრა და საერთაშორისო თანამეგობრობას მოუწოდა, „მტკიცედ იდგნენ გაერთიანებული ერების ორგანიზაციის გვერდით“.

„ჩვენ წინაშე დასმული საკითხი სრულიად მარტივია: გვსურს თუ არა ვიცხოვროთ ამ პირველყოფილ მდგომარეობაში, სადაც ფაქტობრივად ჯუნგლების კანონი ბრუნდება, თუ ცივილიზებულ საერთაშორისო თანამეგობრობაში“, - განაცხადა მან გაეროს გენერალური ასამბლეის ტრიბუნიდან.

„დღეს, ისე როგორც არასდროს, ჩვენი ვალია მტკიცედ ვიდგეთ გაერთიანებული ერების გვერდით, რათა საერთო ინტერესები სწორედ ერთობლივად განვსაზღვროთ“, - დასძინა საფრანგეთის პრეზიდენტმა.

ამავე კონტექსტში, საფრანგეთის ლიდერმა მოუწოდა საერთაშორისო თანამეგობრობას, „არანაირ დათმობაზე არ წავიდნენ“ და გაეროს დაუბრუნონ „სიცოცხლისუნარიანობა“, რათა აღიკვეთოს „მსოფლიოს თანდათანობითი დანაწევრება“.