რუბიო: ტრამპი ირანის პრეზიდენტთან შეხვედრისთვის ღიაა

აშშ-ის პრეზიდენტი, დონალდ ტრამპი ზოგადად ღიაა „ყველასთან“ შეხვედრისთვის, მათ შორის ირანის პრეზიდენტთან, მასუდ პეზეშკიანთან. ამის შესახებ აშშ-ის სახელმწიფო მდივანმა, მარკო რუბიომ ტელეკომპანია NBC News-ის ეთერში განაცხადა.

ტრამპისა და პეზეშკიანის შესაძლო შეხვედრის შესახებ დასმულ შეკითხვაზე რუბიომ აღნიშნა, რომ ამერიკის პრეზიდენტი ზოგადად ღიაა „ყველასთან“ შეხვედრისთვის და პრობლემების მოსაგვარებლად ხალხთან დიალოგის წარმართვას მნიშვნელოვნად მიიჩნევს.

ამასთან, მან ხაზგასმით აღნიშნა, რომ დიალოგისთვის მზადყოფნა მეორე მხარესთან დათანხმებას არ ნიშნავს.

„ასე რომ, ჩვენ ღია ვართ ამისთვის. არ ვფიქრობ, რომ ამჟამად რაიმე შეხვედრაა დაგეგმილი, თუმცა ამისთვის ნამდვილად ღია ვართ“, - განაცხადა რუბიომ.

სახელმწიფო მდივანმა ასევე აღნიშნა, რომ აუცილებელია იმის უზრუნველყოფა, რომ ირანი ბირთვულ იარაღს ვერ მიიღებს.