Anthropic-ში განაცხადეს, რომ ხელოვნური ინტელექტი საყოფაცხოვრებო ტექნიკაში ვირუსივით გავრცელებას შესაძლოა რამდენიმე თვეში ისწავლის

ხელოვნური ინტელექტის მოდელები, რომლებიც დიდ გამოთვლით სიმძლავრეებს არ საჭიროებენ, მალე „ჭკვიან“ საყოფაცხოვრებო ტექნიკაში დამოუკიდებლად გავრცელებას ისწავლიან და ამისთვის თ მონაცემთა ცენტრებზე წვდომა არ დასჭირდებათ, - აცხადებენ კომპანია Anthropic-ში.

კომპანიის ექსპერიმენტები აჩვენებს, რომ მცირე ზომის AI-მოდელებს სულ რაღაც რამდენიმე თვე დასჭირდებათ იმისთვის, რომ „ჭკვიან“ ტექნიკაზე - მაგალითად, ქურებსა და ტელევიზორის სეტ-ტოპ ბოქსებზე დამოუკიდებლად გავრცელების უნარი შეიძინონ.

ასეთი ალგორითმის გაუვნებელყოფა რთული იქნება, რადგან არ არსებობს გამორთვის ერთიანი წერტილი. ტესტირებისას Anthropic-ის სპეციალისტებმა AI 15 იაფფასიანი ტელევიზორის სეტ-ტოპ ბოქსისგან შემდგარ ქსელში გაუშვეს, ხოლო სხვა ექსპერიმენტში ნეიროქსელმა დამოუკიდებლად შეძლო 8 განსხვავებული ტიპის უცნობი მოწყობილობის მუშაობის პრინციპის გარკვევა.

თანამედროვე საჯაროდ ხელმისაწვდომ AI-მოდელებს უკვე შეუძლიათ ჰაკერული გატეხვის ცალკეული ეტაპების შესრულება, თუმცა ჯერჯერობით უშვებენ შეცდომებს, როდესაც მათ ერთიან ჯაჭვად აწყობას ცდილობენ. ამასთან, უფრო დაწინაურებულმა ნეიროქსელმა GLM-5.2-მა წარმატებით განახორციელა ავტონომიური გავრცელების სრული ციკლი გამარტივებულ ვირტუალურ გარემოში.

სრულფასოვანი დამოუკიდებელი AI-ვირუსი ჯერ არ არსებობს, თუმცა მისი გამოჩენა უახლოეს მომავალშია შესაძლებელი. მათთან საბრძოლველად ტექნიკის მწარმოებლებისა და ინტერნეტ-პროვაიდერების ერთობლივი ძალისხმევა გახდება საჭირო.

მანამდე Anthropic-ის, OpenAI-ისა და xAI-ის ხელმძღვანელებმა ხელოვნური ინტელექტის განვითარების ტემპის შენელებისკენ მოუწოდეს. მათ მიაჩნიათ, რომ ნეიროქსელები უფრო სწრაფად ვითარდებიან, ვიდრე მათ გასაკონტროლებლად საჭირო მექანიზმები იქმნება.