მარგარეტ ჰამილტონი, რომელმაც NASA-ს მთვარეზე დაჯდომაში შეუწყო ხელი, 90 წლისა გარდაიცვალა

კომპიუტერული მეცნიერების პიონერი, მარგარეტ ჰამილტონი 90 წლისა გარდაიცვალა. სწორედ მან უხელმძღვანელა პროგრამული უზრუნველყოფის შემუშავებას NASA-ს „აპოლო 11“-ის მისიისთვის, რამაც ნილ არმსტრონგსა და ბაზ ოლდრინს საშუალება მისცა, მშვიდობიანად დაშვებულიყვნენ მთვარის ზედაპირზე.

მეცნიერის გარდაცვალება მასაჩუსეტსის ტექნოლოგიურმა ინსტიტუტმა (MIT) დაადასტურა. MIT-ის განცხადებით, მარგარეტი თავისი ეპოქის უდიდესი ნოვატორი და „პროგრამული ინჟინერიის“ ცნების დამმკვიდრებელი იყო.

ჰამილტონი MIT-ში 1959 წლიდან მუშაობდა და ხელმძღვანელობდა პროგრამული ინჟინერიის განყოფილებას. სწორედ ამ განყოფილებამ შექმნა და გამოცადა ხომალდის ბორტზე არსებული მთელი პროგრამული კოდი, რომელმაც ისტორიული მისიის დროს, მთვარეზე დაჯდომის კრიტიკულ მომენტში, კომპიუტერული ხარვეზის განგაშის მიუხედავად, სისტემის გამართული მუშაობა უზრუნველყო. მეცნიერი იხსენებდა, რომ მას იზიდავდა იდეის მასშტაბურობა და ის ფაქტი, რომ მსგავსი რამ მანამდე არავის გაუკეთებია.

2016 წელს, მეცნიერებასა და კოსმოსურ კვლევებში შეტანილი შეუფასებელი წვლილისთვის, აშშ-ის პრეზიდენტმა ბარაკ ობამამ მარგარეტ ჰამილტონი „თავისუფლების საპრეზიდენტო მედლით“ დააჯილდოვა და მას იმ ქალთა თაობის სიმბოლო უწოდა, რომლებმაც კაცობრიობა კოსმოსში გააგზავნეს. 1936 წელს ინდიანაში დაბადებულმა მეცნიერმა მოგვიანებით საკუთარი კომპანია Hamilton Technologies დააფუძნა.