ლევან იზორია გერმანიის ქრისტიან-დემოკრატიული პარტიის თავმჯდომარეობის კანდიდატს შეხვდა

საქართველოს ელჩმა, გერმანიის ფედერაციულ რესპუბლიკაში, ლევან იზორიამ ქრისტიან-დემოკრატიული პარტიის (CDU) თავმჯდომარეობის კანდიდატთან ფრიდრიხ მერცთან შეხვედრა გამართა. ამის შესახებ ინფორმაციას საგარეო საქმეთა სამინისტრო ავრცელებს.

შეხვედრაზე მხარეებმა ისაუბრეს საქართველოსა და რეგიონში არსებული გლობალური პანდემიით გამოწვეული ვითარების შესახებ და ხაზი გაუსვეს საერთო ძალისხმევის აუცილებლობას კორონავირუსის პანდემიის წინააღმდეგ ბრძოლის გზაზე. ელჩმა აღნიშნა გერმანიისა და ევროკავშირის მიერ, ვირუსის გავრცელების შეკავების მიზნით საქართველოსთვის გაწეული ფინანსური დახმარების მნიშვნელობა.

შეხვედრაზე ასევე განიხილეს საქართველოს ოკუპირებულ ტერიტორიებზე არსებული ვითარება და სამხრეთ კავკასიის რეგიონის უსაფრთხოების საკითხები. ასევე აღინიშნა გერმანიის მხარდაჭერის განსაკუთრებული მნიშვნელობა საქართველოს ევროპული და ევროატლანტიკური ინტეგრაციის გზაზე.

შეხვედრაზე კიდევ ერთხელ ხაზი გაესვა საქართველო-გერმანიას შორის ტრადიციულად მეგობრულ ორმხრივ ურთიერთობებს და აღინიშნა თანამშრომლობის კიდევ უფრო გაღრმავების სურვილი.