საფრანგეთის საპრეზიდენტო არჩევნების კანდიდატი, ჟან-ლუკ მელანშონი: ჩვენ არაფერი გვესაქმება ნატოში

ფრანგული მემარცხენე პარტია „დაუმორჩილებელი საფრანგეთის“ (LFI) ლიდერმა და 2027 წლის საპრეზიდენტო არჩევნების კანდიდატმა, ჟან-ლუკ მელანშონმა პარიზის გარეუბან ლე ბურჟეში გამართულ ყრილობაზე საკუთარი საარჩევნო პროგრამა წარადგინა. მან მკვეთრად გააკრიტიკა ნატო და „ამერიკული ომები“, ეკონომიკის აღსადგენად კი სტიმულირების პოლიტიკის გატარების პირობა დადო.

75 წლის მელანშონი, რომელსაც 2027 წლის აპრილის არჩევნებში მემარცხენე ფლანგის ყველაზე ძლიერ კანდიდატად მიიჩნევენ, აცხადებს, რომ პრეზიდენტ ემანუელ მაკრონის კურსის საპირისპიროდ იმოქმედებს.

მელანშონის საარჩევნო მანიფესტი „ერთობლივი მომავალი“ რამდენიმე საკვანძო ინიციატივას ითვალისწინებს. კერძოდ, იგეგმება მაკრონის საპენსიო რეფორმის გაუქმება და 60-წლიანი საპენსიო ასაკის დაბრუნება იმ პირთათვის, ვისაც 40-წლიანი სამუშაო სტაჟი აქვს.

ცხოვრების გაძვირებასთან გამკლავების მიზნით, მელანშონი პირველადი მოხმარების პროდუქტებზე ფასების გაყინვას, წმინდა მინიმალური ხელფასის 1 700 ევრომდე გაზრდას და ხელფასების ინდექსაციას ითხოვს. გარდა ამისა, ინიციატივა კაპიტალურ შემოსავლებზე ფიქსირებული გადასახადის გაუქმებასა და უმდიდრესი ოჯახების საგადასახადო ტვირთის გაზრდას ითვალისწინებს.

საგარეო პოლიტიკის ნაწილში მელანშონი კვლავ ნატოსადმი ტრადიციულ კრიტიკას უბრუნდება და ალიანსიდან საფრანგეთის ეტაპობრივ გამოსვლას ითხოვს, რაც პირველ ეტაპზე მის სამხედრო სტრუქტურებიდან გამოყვანას გულისხმობს.

„ჩვენ არაფერი გვესაქმება ნატოში და არც ამერიკულ ომებში. საფრანგეთმა მიუმხრობელი ქვეყნების გლობალური ფრონტი უნდა ჩამოაყალიბოს“, - განაცხადა მელანშონმა.

გარდა ამისა, პროგრამა ითვალისწინებს ატომურ ენერგეტიკაზე ეტაპობრივად უარის თქმას და განახლებად ენერგიაზე სრულად გადასვლას, მათ შორის ახალი თაობის ბირთვული რეაქტორების (EPR2) მშენებლობის შეჩერებას. მელანშონმა ასევე გააკრიტიკა გერმანიის გავლენა ევროკავშირის ეკონომიკურ პოლიტიკაზე და ბერლინი მკაცრი საბიუჯეტო წესების მთავარ დამცველად მოიხსენია.