აშშ-ის ელჩი პოლონეთში საკონსტიტუციო სასამართლოს გარშემო განვითარებულ მოვლენებზე: ამერიკა პოლონეთის მხარესაა. ჩვენი საქმე არ არის მისი საშინაო საქმეების შეფასება ან მათში ჩარევა

აშშ-ის ელჩი პოლონეთში ტომ როუზი საკონსტიტუციო სასამართლოს გარშემო განვითარებულ მოვლენებს სოციალურ ქსელ X-ში გამოეხმაურა.

როგორც ამერიკელმა დიპლომატმა აღნიშნა, პოლონეთის საკონსტიტუციო სასამართლოში წუხელ განვითარებული მოვლენები „მართლაც ძალიან სერიოზულია“.

„როგორც ჩანს, ჩვენ ვხედავთ უპრეცედენტო დაპირისპირებას, რომელიც უკავშირდება მთავრობის მიერ სახელმწიფო ძალაუფლების გამოყენებას, ასევე საკონსტიტუციო ინსტიტუტის დამოუკიდებლობასა და უფლებამოსილებას.

მომხდარისა და მისი მიზეზების შესახებ ორივე მხარე ერთმანეთისგან მკვეთრად განსხვავებულ ვერსიებს ავრცელებს. საბოლოოდ, რა ფაქტებიც არ უნდა დადგინდეს, სასამართლოს შენობასთან შეკრებილი ათასობით ადამიანი ისედაც სახიფათო ვითარებას კიდევ უფრო ამწვავებს. უკანასკნელი, რაც პოლონეთს სჭირდება, არის დაპირისპირება, რომელიც შესაძლოა გაცილებით მძიმე მოვლენებში გადაიზარდოს.

ამერიკა პოლონეთის მხარესაა. ჩვენი საქმე არ არის მისი საშინაო საქმეების შეფასება ან მათში ჩარევა. ჩვენ გვაღელვებს იმ ქვეყნის სტაბილურობა, უსაფრთხოება და დემოკრატიული მომავალი, რომელსაც სიამაყით ვუწოდებთ ჩვენს მეგობარსა და მოკავშირეს“, - დაწერა როუზმა.

აშშ-ის ელჩმა იმედი გამოთქვა, რომ ყველა ჩართული მხარე - მთავრობის წარმომადგენლები, სამართალდამცველები და დემონსტრანტები - დამშვიდდება და არ გადადგამს ისეთ ნაბიჯებს, რომლებმაც შესაძლოა ძალადობა ან ვითარების შემდგომი ესკალაცია გამოიწვიოს.

„ამერიკელები და პრეზიდენტი დონალდ ტრამპი დიდად ზრუნავენ ამ ქვეყანაზე, მის დემოკრატიასა და მომავალზე. თუმცა პოლონეთის სიძლიერე საბოლოოდ თავად პოლონეთისგან, მისი ხალხისგან, ინსტიტუტებისა და კანონის უზენაესობისადმი მათი საერთო ერთგულებისგან უნდა მოდიოდეს.

პოლონეთმა ძალიან დიდი გზა გაიარა და ბევრ რამეს მიაღწია იმისთვის, რომ პოლიტიკური უთანხმოებების გამო, რაც არ უნდა მწვავე იყოს ის, ეს ყველაფერი საფრთხის ქვეშ არ დააყენოს“, - აღნიშნა ელჩმა.