The Economist: აშშ დონბასში დემილიტარიზებული ზონის შექმნის, რუსეთისთვის დაწესებული სანქციების მოხსნის და ნატოს ნაცვლად უკრაინის ევროკავშირში გაწევრიანების იდეას განიხილავს

აშშ-ის პრეზიდენტის დონალდ ტრამპის ადმინისტრაცია უკრაინასა და რუსეთს შორის ომის დასრულების გზების ძიების პარალელურად მოსკოვისთვის ეკონომიკური შეღავათების შეთავაზებას განიხილავს. The Economist-ის ინფორმაციით, შესაძლო შეთანხმება უკრაინისგან ნატოში გაწევრიანებაზე უარის თქმას მოითხოვს, სანაცვლოდ კი კიევს ევროკავშირში გაწევრიანებასა და საინვესტიციო მხარდაჭერას ჰპირდება.

რუსეთს, თავის მხრივ, სანქციების შემსუბუქება და დასავლურ ბიზნესთან ურთიერთობების აღდგენა შეიძლება შესთავაზონ.

გამოცემის შეფასებით, ვაშინგტონის მიდგომა კითხვებს აჩენს, რამდენად ითვალისწინებს ის უკრაინის უსაფრთხოების ინტერესებს და რამდენად მზად არის რუსეთი რეალური სამშვიდობო შეთანხმებისთვის.

გამოცემის შეფასებით, ტრამპის ადმინისტრაცია ცდილობს, სწრაფად მიაღწიოს შეთანხმებას და ამ პროცესში უკრაინაზე ზეწოლას აძლიერებს. თუმცა, ეს მიდგომა შესაძლოა რუსეთს უფრო ხელსაყრელ მდგომარეობაში აყენებდეს, რადგან მოსკოვს სანქციების შემსუბუქებისა და ეკონომიკური სარგებლის მიღება ომის დასრულებამდე შეუძლია.

The Economist-ის ცნობით, განხილული წინადადებების ერთ-ერთი ვარიანტი დონბასში დემილიტარიზებული ზონის შექმნას ითვალისწინებს. ამასთან, რუსეთს შესაძლოა სანქციების შემსუბუქება, ამერიკულ ბიზნესთან თანამშრომლობის აღდგენა და საერთაშორისო ასპარეზზე პოლიტიკური ურთიერთობების ნორმალიზება შესთავაზონ.

უკრაინისთვის კი შესაძლო შეთანხმება საინვესტიციო მხარდაჭერის პაკეტსა და ევროკავშირში გაწევრიანების პერსპექტივას მოიცავს. სანაცვლოდ, კიევმა ნატოში გაწევრიანებაზე უარი უნდა თქვას.

ეს პირობები ჯერჯერობით შესაძლო შეთანხმების ვარიანტებად განიხილება და არა მხარეების მიერ მიღებულ საბოლოო გადაწყვეტილებად. უკრაინისთვის განსაკუთრებით მნიშვნელოვანი საკითხია უსაფრთხოების გარანტიები - რამდენად დაიცავს შეთანხმება ქვეყანას რუსეთის მხრიდან ახალი თავდასხმისგან და რა მექანიზმები ამოქმედდება, თუ მოსკოვი ნაკისრ ვალდებულებებს დაარღვევს.

შესაძლო შეთანხმების კიდევ ერთი მიმართულება რუსული გაზის ევროპაში მიწოდების აღდგენაა. გამოცემის ცნობით, პუტინისთვის შეთავაზებულ დამატებით სტიმულად შესაძლოა რუსული გაზის ევროპულ ბაზარზე დაბრუნება და „ჩრდილოეთ ნაკადის“ მილსადენის ამოქმედება განიხილებოდეს.