POLITICO: ესპანეთის არჩევნებმა შესაძლოა ბრიუსელში პოლიტიკური ბალანსი შეცვალოს

ესპანეთში პრემიერ-მინისტრ პედრო სანჩესის მარცხმა შესაძლოა ევროკავშირის პოლიტიკურ ცენტრში ძალთა ბალანსზე გავლენა მოახდინოს. ინფორმაციას POLITICO ავრცელებს.

გამოცემის შეფასებით, სანჩესის მთავრობის ცვლილება ევროპარლამენტში სოციალისტებისა და დემოკრატების პოზიციებს შეასუსტებს და მათ ევროკავშირის პოლიტიკაზე უფრო კონფრონტაციული პოზიციის დაკავებისკენ უბიძგებს.

სანჩესი ამჟამად ერთადერთი სოციალისტი ლიდერია, რომელიც ევროკავშირის ერთ-ერთ დიდ ქვეყანას მართავს. მისი მონაწილეობა ევროპული საბჭოს გადაწყვეტილებების მიღების პროცესში მნიშვნელოვან მემარცხენე-ცენტრისტულ საპირწონეს ქმნის, სადაც ცენტრისტული მემარჯვენეები დომინირებენ.

ესპანელი კანონმდებლები ევროპარლამენტში სოციალისტებისა და დემოკრატების ყველაზე დიდ ეროვნულ დელეგაციას წარმოადგენენ. POLITICO-ს ცნობით, როდესაც სანჩესი ევროპული საბჭოს დონეზე კონკრეტულ შეთანხმებას აღწევს, ესპანელი ევროპარლამენტარები, როგორც წესი, მის პოზიციას ჯგუფის შიგნითაც უჭერენ მხარს.

გამოცემასთან საუბრისას სოციალისტებისა და დემოკრატების რამდენიმე მაღალჩინოსანმა დეპუტატმა განაცხადა, რომ მადრიდში ხელისუფლების ცვლილება ამ ვითარებას შეცვლის.

„შესაძლოა, გაჩნდეს ცდუნება, რომ ევროპული საბჭოს პოზიციებს უფრო კრიტიკულად შევხედოთ, თუ დიდი ქვეყნის სოციალისტი პრემიერ-მინისტრი აღარ იქნება“, - განაცხადა გერმანიის სოციალ-დემოკრატიული პარტიის დელეგაციის ხელმძღვანელმა ევროპარლამენტში რენე რეპასიმ.

სოციალისტებისა და დემოკრატების კიდევ ერთმა მაღალჩინოსანმა აღნიშნა, რომ სანჩესი ევროპული საბჭოს დონეზე მიღებულ გადაწყვეტილებებში ბალანსის შენარჩუნებას უწყობდა ხელს. მისი თქმით, სანჩესის გარეშე შესაძლოა დაირღვეს არაფორმალური თანამშრომლობა სოციალისტებსა და დემოკრატებს, ლიბერალებსა და მემარჯვენე ცენტრისტულ „ევროპის სახალხო პარტიას“ შორის, რომელსაც ევროკომისიის პრეზიდენტი ურსულა ფონ დერ ლაიენი საკანონმდებლო ინიციატივების გასატარებლად ეყრდნობა.

POLITICO-ს ცნობით, 2024 წლის ევროპარლამენტის არჩევნების შემდეგ ევროპარლამენტი უფრო მარჯვნივ გადაიხარა. EPP-მ გარკვეული კანონპროექტების მისაღებად ულტრამემარჯვენე ჯგუფებთან თანამშრომლობაც გამოიყენა, მაშინ როდესაც სოციალისტებს ევროკავშირის წევრი ქვეყნების მთავრობებში წარმომადგენლობა და საკუთარი კომისრების რაოდენობა შეუმცირდათ.

თუ სანჩესი ხელისუფლებას დატოვებს, სოციალისტებისა და დემოკრატების სამი უმსხვილესი ეროვნული დელეგაცია იტალიიდან, რუმინეთიდან და საფრანგეთიდან საკუთარ ქვეყნებში ოპოზიციაში აღმოჩნდება. სოციალისტებთან დაკავშირებული პარტიებიდან მთავრობაში მხოლოდ გერმანიისა და ავსტრიის მმართველი კოალიციების უმცროსი პარტნიორები, ასევე დანიის სოციალ-დემოკრატები დარჩებიან.

ამ ვითარებაში ევროკომისიის პრეზიდენტზე ურსულა ფონ დერ ლაიენზე ზეწოლა შესაძლოა გაიზარდოს, რათა მან მემარჯვენე-ცენტრისტული ძალების მიერ ულტრამემარჯვენე ჯგუფებთან თანამშრომლობის ფონზე სოციალისტებისა და დემოკრატების მოთხოვნები უფრო მეტად გაითვალისწინოს.

„თუ ფონ დერ ლაიენი კვლავ შეასრულებს სოციალისტებისა და დემოკრატების პრიორიტეტებს, მას ჯგუფის მხარდაჭერა ექნება. თუ ეს ასე არ იქნება, ის ამ მხარდაჭერას დაკარგავს“, - განაცხადა რეპასიმ.