მარკო რუბიო: ერებს არ სჭირდებათ საკუთარი იდენტობის უარყოფა საერთო ინტერესების დასანახად

ათენის აკროპოლისის წინ სიტყვით გამოსვლისას აშშ-ის სახელმწიფო მდივანმა, მარკო რუბიომ განაცხადა, რომ მსოფლიო „გარდატეხის წერტილშია“.

ერები, განსაკუთრებით ევროპაში, ანტიკური საბერძნეთის ღირებულებებს უნდა დაუბრუნდნენ და „ხელახლა ააგონ ჩვენი ინსტიტუტები და ალიანსები, რათა ამ საფრთხეებს ერთად დავუპირისპირდეთ“.

„ჩვენ გვჯერა, რომ ევროპას შეუძლია გაიღვიძოს თავისი ხანგრძლივი ძილისგან და ხელახლა დაანთოს ის ცეცხლი, რომელიც აქ ათასწლეულების წინ ენთო“, - განაცხადა მან.

რუბიომ ასევე აღნიშნა: „ერებს არ სჭირდებათ საკუთარი იდენტობის უარყოფა საერთო ინტერესების დასანახად“.

რუბიო, რომელსაც ხშირად მოიხსენიებენ 2028 წლის საპრეზიდენტო არჩევნების სავარაუდო კანდიდატად, შეეხო მსოფლიოში არსებულ საფრთხეებს.

თუმცა მისი გამოსვლის უდიდესი ნაწილი უფრო ფართო საფრთხეს დაეთმო და მიმდინარე პერიოდი გზაჯვარედინად აღწერა.

„ჩვენ მიერ არჩეული კურსი განსაზღვრავს, შეინარჩუნებს თუ არა დასავლეთი თავის ადგილს მსოფლიოს სათავეში, თუ შეეგუება ატროფიის, მონობისა და დაცემის მომავალს“, - განაცხადა მან. - „მომდევნო ათწლეული დაწერს მომდევნო საუკუნის ისტორიას“.

რუბიომ მოუწოდა „პოლიტიკისა და სახელმწიფო მართვის კლასიკური გაგებისკენ“ დაბრუნებისკენ, რომლის აღდგენასაც „ტრამპის ადმინისტრაცია იმედოვნებს - არა მხოლოდ ჩვენი ქვეყნისთვის, არამედ მთელი ჩვენი ცივილიზაციისთვის“.

„სიტყვა ნაციონალიზმი უხამს სიტყვად იქცა“, - თქვა მან. - „ამიტომ დავანგრიეთ ჩვენი ძეგლები. დავგმეთ საკუთარი ისტორია და უამრავ ადგილას ჩვენს შვილებს ვასწავლეთ, რცხვენოდეთ იმ ქვეყნების, რომლებსაც მემკვიდრეობით მიიღებდნენ. ამ პროცესში გავხსენით ჩვენი საზღვრები, გავიტანეთ ჩვენი ინდუსტრია და დავუშვით ჩვენი სამხედრო ძალების დაუძლურება და დაცემა“.