Deutsche Welle: „ნარინჯისფერი ჭირი“ - სტრასბურგში, ევროპარლამენტის შენობაში, შიშველი დონალდ ტრამპის ამსახველი სატირული ქანდაკება დადგეს

სტრასბურგში, ევროპარლამენტის შენობაში, აშშ-ის პრეზიდენტის, დონალდ ტრამპის ამსახველი 2.5 მეტრი სიმაღლის სატირული ქანდაკება დადგეს. ინფორმაციას ამის შესახებ გერმანული გამოცემა Deutsche Welle ავრცელებს.

დანიელი ხელოვანის, იენს გალშიოტის ნამუშევარს „ნარინჯისფერი ჭირის“ და „უსამართლობის მეფის“ სახელით იცნობენ. ქანდაკება შიშველ ტრამპს ასახავს, რომელსაც ხელში გოლფის ჯოხი უჭირავს და შედარებით მცირე ზომის ადამიანის მხრებზე ზის.

ქანდაკების გვერდით განთავსებულია საინფორმაციო ბარათები განმარტებით: „ყველაფერს გავაკეთებდი მის დასახმარებლად. გარდა იმისა, რომ ზურგიდან ჩამოვსულიყავი“.

მოქანდაკის თქმით, ეს ნამუშევარი პროტესტია ტრამპის იმ პოლიტიკის მიმართ, რომელიც ხელს უშლის კლიმატის ცვლილებასთან ბრძოლას.

ექსპონატი ევროპარლამენტის ორ შენობას შორის არსებულ გასასვლელშია განთავსებული და ხუთშაბათამდე დარჩება. ხელოვანი სტრასბურგში დანიელმა ევროპარლამენტარმა, პერ კლაუსენმა მიიწვია, რომელმაც აღნიშნა, რომ ტრამპის შესაძლო რეაქცია არ ადარდებს: „თუ ვინმე იმდენად სუსტია, რომ ევროპარლამენტში ამ ქანდაკების გამოფენას ვერ იტანს, მსოფლიო პოლიტიკურ ასპარეზზე მისი ადგილი არ არის“.

აშშ-ის პრეზიდენტს ამ ფაქტზე კომენტარი ჯერ არ გაუკეთებია. აღსანიშნავია, რომ „ნარინჯისფერი ჭირი“ მანამდე ევროპის სხვა ქალაქებსა და ბრაზილიაში გამართულ გაეროს კლიმატის კონფერენციაზეც (COP30) იყო გამოფენილი.