გერმანიაში საგარეო დაზვერვის ყოფილი ხელმძღვანელი ჯაშუშობის ბრალდებით დააკავეს

გერმანიაში საგარეო დაზვერვის სამსახურის (BND) ყოფილი ხელმძღვანელი აუგუსტ ჰანინგი ჯაშუშობის ბრალდებით დააკავეს. ინფორმაციას DW ავრცელებს.

გამოცემის ცნობით, საქმეზე კიდევ ერთი ყოფილი თანამშრომელია დაკავებული. გერმანიის პროკურატურა იძიებს, გადაეცა თუ არა უცხო ძალას საიდუმლო ინფორმაცია.

80 წლის აუგუსტ ჰანინგი BND-ს 1998-2005 წლებში ხელმძღვანელობდა. გერმანიის ხელისუფლების ინფორმაციით, მის წინააღმდეგ გამოძიება მიმდინარეობს სახელმწიფო ღალატის, სახელმწიფო საიდუმლოების მოპოვებისა და უცხო ქვეყნის სადაზვერვო საქმიანობაში შესაძლო მონაწილეობის ბრალდებებით.

საქმეზე ასევე დააკავეს BND-ს კიდევ ერთი ყოფილი თანამშრომელი, რომელიც ჰანინგის დროს მისი აპარატის ხელმძღვანელი იყო. გამოძიების ვერსიით, მან ჰანინგს სამსახურის დატოვების შემდეგაც მიაწოდა საიდუმლო ინფორმაცია.

გამომძიებლების ინფორმაციით, 2010 წლიდან ყოფილმა თანამშრომელმა ჰანინგს დაახლოებით 2 000 საიდუმლო დოკუმენტი მიაწოდა. ვარაუდობენ, რომ ჰანინგი ამ მასალების ნაწილს საკონსულტაციო საქმიანობის ფარგლებში იყენებდა. ერთ-ერთ შემთხვევაში კი, გამოძიების ცნობით, მან საიდუმლო მონაცემების საფუძველზე უცხო ქვეყნის სადაზვერვო სამსახურის წარმომადგენლისთვის ანალიზიც მოამზადა.

გამოძიება ასევე ადგენს, მოხვდა თუ არა აღნიშნული ინფორმაცია უცხო ქვეყნის სპეცსამსახურის ხელში. ამ ეტაპზე გერმანიის ხელისუფლებას არ დაუსახელებია, რომელი ქვეყანა შეიძლება ყოფილიყო ინფორმაციის საბოლოო მიმღები. ასევე, გამოძიებას რუსეთის კავშირზე მტკიცებულება არ გამოუქვეყნებია.

ჰანინგისა და მეორე ეჭვმიტანილის დაკავების პარალელურად მათი საცხოვრებელი და სამუშაო სივრცეები გაჩხრიკეს. საქმეზე გამოძიება გრძელდება.

გერმანული მედიის ინფორმაციით, საქმე შესაძლოა გერმანიის უახლესი ისტორიის ერთ-ერთ ყველაზე მასშტაბურ ჯაშუშობის საქმედ იქცეს.