საფრანგეთის შინაგან საქმეთა მინისტრი: იმ მომენტიდან, როდესაც ვითარება ქალაქურ ძალადობაში გადადის, თქვენ უკვე აღარ იმყოფებით საზოგადოებრივი წესრიგის სტანდარტული დაცვის რეჟიმში - სრულიად ნორმალურია, რომ პოლიციელებსა და ჟანდარმებს ჰქონდეთ წვდომა მათ ხელთ არსებული არალეტალური იარაღის მთელ სპექტრზე

საფრანგეთში დემონსტრაციებისა და მოსწავლეთა საპროტესტო აქციების დროს პოლიციის მიერ არალეტალური იარაღის, მათ შორის, სპეციალური ყუმბარებისა და რეზინის ტყვიების გამშვები მოწყობილობების გამოყენებამ საზოგადოებაში დიდი კრიტიკა გამოიწვია. აღნიშნულ საკითხს საფრანგეთის შინაგან საქმეთა მინისტრი ლორან ნუნიესი გამოეხმაურა და ძალოვანი უწყებების ქმედებები დაიცვა.

რადიოსადგურ France Inter-ის ეთერში გამოსვლისას ნუნიესმა განმარტა, რომ მსგავსი საშუალებების გამოყენება სრულიად გამართლებულია, როდესაც სიტუაცია ჩვეულებრივი საზოგადოებრივი წესრიგის დაცვის ჩარჩოებს სცილდება.

„იმ მომენტიდან, როდესაც ვითარება ქალაქურ ძალადობაში გადადის, თქვენ უკვე აღარ იმყოფებით საზოგადოებრივი წესრიგის სტანდარტული დაცვის რეჟიმში. სრულიად ნორმალურია, რომ პოლიციელებსა და ჟანდარმებს ჰქონდეთ წვდომა მათ ხელთ არსებული არალეტალური იარაღის მთელ სპექტრზე“, - განაცხადა შინაგან საქმეთა მინისტრმა.

ნუნიესმა ხაზგასმით აღნიშნა, რომ სამართალდამცველები აღნიშნულ საშუალებებს მხოლოდ „საკანონმდებლო და რეგულატორული ნორმების მკაცრი დაცვით“ და „პროპორციულად“ იყენებენ, მათ შორის არასრულწლოვნების მონაწილეობით მიმდინარე არეულობების დროსაც.