The Washington Post: კრისტა პაიკის ადვოკატების განცხადებით, იგი ცოცხალია, კრიტიკულ მდგომარეობაში იმყოფება და გადაუდებელ სამედიცინო დახმარებას იღებს

კრისტა პაიკის ადვოკატების განცხადებით, იგი ცოცხალია, კრიტიკულ მდგომარეობაში იმყოფება და გადაუდებელ სამედიცინო დახმარებას იღებს. მანამდე, წინა ღამით, ტენესის შტატის ხელისუფლებამ მისი სასიკვდილო ინექციით დასჯა სცადა, თუმცა უშედეგოდ. ინფორმაციას ამის შესახებ გამოცემა The Washington Post-ი ავრცელებს.

პაიკის ადვოკატის, რენდი სპაივის განცხადებით, სიკვდილით დასჯის პროცესში მან მის მარცხენა მკლავში შეყვანილი სულ მცირე შვიდი ნემსი დაითვალა. მან ასევე დასძინა, რომ ამოღებისას ერთ-ერთი ნემსი მოღუნული ჩანდა.

პაიკის ადვოკატები ადრე აცხადებდნენ, რომ სიკვდილით დასჯისას მას სასიკვდილო ინექციის პრეპარატის ორი დოზა შეიყვანეს. ხუთშაბათს გავრცელებულ განცხადებაში მათ აღწერეს მძიმე და საზარელი საღამო, რომელიც ხარვეზებითა და კომუნიკაციის არარსებობით იყო აღბეჭდილი.

„გუბერნატორმა კრისტას სასჯელი დაუყოვნებლივ უნდა შეუმსუბუქოს“, - განაცხადა სპაივიმ ხუთშაბათს გამართულ ბრიფინგზე.

ტენესის შტატის გუბერნატორმა, ბილ ლიმ შტატში სიკვდილით დასჯის პროცესი შეაჩერა და პაიკის სიკვდილით დასჯისას დაშვებული შეცდომების გამოძიება ბრძანა. მან აღნიშნა, რომ მომხდარით „ფრიად იმედგაცრუებულია“.