უკრაინული მედია: რუსეთის თავდასხმებს უკრაინაში ექვსი ადამიანი ემსხვერპლა, 45 კი დაშავდა - კიევზე იერიშები მეორე დღეა, გრძელდება

რუსეთის თავდასხმებს უკრაინის სხვადასხვა რეგიონში ბოლო 24 საათის განმავლობაში ექვსი ადამიანი ემსხვერპლა, 45 კი დაშავდა. ინფორმაციას უკრაინული მედია ადგილობრივ ხელისუფლებაზე დაყრდნობით ავრცელებს.

კიევი უკვე მეორე დღეა, თითქმის უწყვეტი საჰაერო თავდასხმის ქვეშაა. 26 სექტემბერს, ადგილობრივი დროით დილის 10 საათისთვის, დედაქალაქში საჰაერო განგაში ხუთჯერ გამოცხადდა. კიევის მერის ვიტალი კლიჩკოს ინფორმაციით, რუსეთის თავდასხმების შედეგად ქალაქის ოთხ რაიონში ხუთი ადამიანი დაშავდა.

კიევის ოლქში, დედაქალაქის სამხრეთ-დასავლეთით მდებარე ბორისპოლის რაიონში, კიდევ ორი ადამიანი დაშავდა, იუწყება მედია.

კიევსა და მის მეზობელ რეგიონებზე თავდასხმების პარალელურად, რუსეთის ძალებმა 26 სექტემბრის ღამეს უკრაინის მიმართულებით „შაჰედის“ ტიპის 173 დრონი გაუშვეს, მათგან 50 რეაქტიული ძრავით იყო აღჭურვილი. ამის შესახებ უკრაინის საჰაერო ძალებმა განაცხადეს.

უკრაინის საჰაერო თავდაცვის სისტემებმა 134 დრონის ჩამოგდება შეძლეს. დრონები 19 ლოკაციაზე ჩამოვარდა. დონეცკის ოლქში ქალაქ დრუჟკივკაში, რუსეთის თავდასხმას ორი ადამიანი ემსხვერპლა, კიდევ რვა დაშავდა.

ქალაქ ზაპოროჟიესა და მის რაიონში რუსეთის თავდასხმებს ორი ქალი ემსხვერპლა, შვიდი ადამიანი კი დაშავდა.

სუმის ოლქში რუსეთის დრონებით თავდასხმას 69 წლის მამაკაცი ემსხვერპლა. რუსეთის მართვადი ბომბების დარტყმების შედეგად კი 10 ადამიანი დაშავდა, მათ შორის 1,5 თვის ჩვილი და 15 წლის მოზარდი. რეგიონში სხვა დრონებით თავდასხმების შედეგად ასევე დაშავდნენ 75 წლის მამაკაცი და 14 წლის გოგონა.

ხერსონის ოლქში რუსეთის ძალებმა 35 დასახლებულ პუნქტზე მიიტანეს იერიში. თავდასხმებს ერთი ადამიანი ემსხვერპლა, სამი კი დაშავდა.

ქალაქ ხარკოვში რუსეთის თავდასხმების შედეგად ოთხი ადამიანი დაშავდა. კიდევ ერთი, 27 წლის მამაკაცი, სოფელ ზოლოჩივში დაშავდა.

დნეპროპეტროვსკის ოლქში, ნიკოპოლის რაიონზე განხორციელებული რუსეთის თავდასხმების შედეგად ოთხი ადამიანი დაშავდა. მათგან ორი საავადმყოფოში გადაიყვანეს, ერთის მდგომარეობა კი მძიმეა.