Euronews: ბრიუსელი კიევს რეფორმების დაჩქარებისკენ მოუწოდებს - უკრაინას 20 მილიარდ ევრომდე ფინანსური დახმარების მიღება სჭირდება

ბრიუსელი კიევზე ზეწოლას აძლიერებს, რათა უკრაინამ იმ რეფორმების განხორციელება დააჩქაროს, რომლებიც დაახლოებით 20 მილიარდი ევროს ოდენობის ფინანსური დახმარების მისაღებად არის აუცილებელი. ინფორმაციას Euronews-ი ავრცელებს.

ტელეარხის ცნობით, უკრაინას ეს თანხები განსაკუთრებით სჭირდება, რადგან ქვეყნის ბიუჯეტის დეფიციტი იზრდება და რუსეთი საომარ მოქმედებებს აძლიერებს.

„აუცილებელია, რომ უკრაინამ გააგრძელოს ევროკავშირთან ერთობლივად შეთანხმებული რეფორმებისა და პოლიტიკის პირობების შესრულება. მათი დროული განხორციელება გადამწყვეტია იმისთვის, რომ კომისიამ შესაბამისი თანხების დაგეგმილი წესით გაცემა შეძლოს“, - განაცხადა ევროკომისიის წარმომადგენელმა.

Euronews-ის ცნობით, აღნიშნული განცხადება იმ ფონზე გაკეთდა, როდესაც ევროკომისია უკრაინის ხელისუფლებასთან ინტენსიურ მოლაპარაკებებს აწარმოებს, რათა ქვეყნის ფინანსური დეფიციტის ზუსტი მასშტაბი დადგინდეს. პროცესში ჩართულია საერთაშორისო სავალუტო ფონდიც, რომელსაც უკრაინის დახმარების საკუთარი პროგრამა აქვს.

უკრაინის პრეზიდენტმა ვოლოდიმირ ზელენსკიმ თავდაპირველად თავდაცვის სამინისტროს 27 მილიარდი დოლარის, ანუ 23,75 მილიარდი ევროს ოდენობის ფინანსურ დეფიციტზე ისაუბრა. ამ თანხამ ევროკავშირის წარმომადგენლები მოულოდნელობის წინაშე დააყენა და მისი წარმომავლობის შესახებ კითხვები გააჩინა.

გარდა ამისა, უკრაინას მომავალ წელს 32,6 მილიარდი დოლარის ფინანსური დანაკლისი აქვს.

პრობლემის გადასაჭრელად ზელენსკიმ ევროკავშირის მიერ გათვალისწინებული 90-მილიარდიანი დახმარების სესხის ნაწილის 2027 წლიდან 2026 წლისთვის წინმსწრებად გადმოტანის წინადადება წამოაყენა. სესხი ორ, 45-45 მილიარდი ევროს ოდენობის ნაწილად არის გაყოფილი, რაც ნიშნავს, რომ ვადების ცვლილების შემთხვევაში მომავალ წელს უკრაინისთვის ნაკლები თანხა დარჩება.

ზელენსკიმ ასევე წამოაყენა გაყინული რუსული აქტივების გამოყენების იდეა - ინიციატივა, რომელიც ევროკავშირმა გასულ წელს განიხილა, თუმცა მისი განხორციელება ვერ შეძლო.

ბრიუსელი ამ მიდგომას არ ეთანხმება და ხაზს უსვამს, რომ დამატებითი რესურსების მოთხოვნამდე უკრაინამ ყურადღება იმ რეფორმების დასრულებაზე უნდა გაამახვილოს, რომელთა დამტკიცების ვალდებულებაც ქვეყანას აღებული აქვს, თუმცა ისინი უკრაინის უმაღლეს რადაში ამჟამად შეჩერებულია.

რეფორმების განხორციელება ევროკავშირისგან ორი ფინანსური პაკეტის მისაღებად აუცილებელი პირობაა: 13,5 მილიარდი ევროს ოდენობის მხარდაჭერის სესხისა და 6,45 მილიარდი ევროს ოდენობის Ukraine Facility-ის ფარგლებში, წერს ტელეარხი.

ხუთშაბათს უკრაინისთვის საერთო ჯამში 2,9 მილიარდი ევროს ოდენობის გადაცემის საკითხი დამტკიცდა. თუმცა კანონმდებლობის მიღების ნელმა ტემპმა მეორე, 3,9 მილიარდი ევროს ოდენობის ტრანშის გადაცემა შეაფერხა.

ვითარებამ ევროკომისარ ვალდის დომბროვსკისსა და ევროკომისარ მარტა კოსს უბიძგა უმაღლესი რადის სპიკერისთვის რუსლან სტეფანჩუკისთვის წერილი გაეგზავნათ და არსებული მდგომარეობის მნიშვნელობაზე გაეფრთხილებინათ.

„აუცილებელი კანონმდებლობის დროული მიღება გადამწყვეტია ევროკავშირის ხელმისაწვდომი დაფინანსების უზრუნველსაყოფად, უკრაინის ევროკავშირში გაწევრიანების გზაზე არსებული დინამიკის შესანარჩუნებლად და უკრაინის ეკონომიკისა და საჯარო ფინანსების გასაძლიერებლად“, - წერენ ისინი.

Euronews-ის მიერ ნანახ წერილს თან ერთვის იმ რეფორმების ჩამონათვალი, რომლებიც „მიღებას ელოდება“ და რომელთა დამტკიცება და განხორციელებაც ბრიუსელს მოკლევადიან პერიოდში სურს.

ზოგიერთი კანონპროექტი, მათ შორის მცირე და საშუალო ბიზნესის გადახდისუუნარობასთან, საჯარო სამსახურთან და დღგ-ის გამარტივებასთან დაკავშირებული ინიციატივები, უკვე განიხილება რადაში. სხვა კანონპროექტები, მათ შორის სახელმწიფო დახმარების, ფულის გათეთრების წინააღმდეგ ბრძოლისა და პროკურორებისთვის დისციპლინური სისტემის შესახებ კანონები, პარლამენტში ჯერ არ შესულა.

განსაკუთრებით სადავო აღმოჩნდა კანონპროექტი, რომელიც საერთაშორისო ამანათებისთვის საბაჟო შეღავათის გაუქმებას ითვალისწინებს. ინიციატივას უკრაინელი კანონმდებლების ნაწილი ეწინააღმდეგება, რადგან ქვეყანაში ჩინური ონლაინ მარკეტები, მათ შორის Temu და AliExpress-ი, განსაკუთრებით პოპულარულია.