The Wall Street Journal: რატომ სურთ სპარსეთის ყურის ქვეყნებს, რომ ტრამპმა ირანთან პოზიცია არ შეცვალოს?

აშშ-სა და ირანს შორის ომის დასრულების მიზნით მოლაპარაკებების განახლების მცდელობას სპარსეთის ყურის ნავთობის უმსხვილესი მწარმოებლები ეწინააღმდეგებიან. გამოცემა The Wall Street Journal-ის ინფორმაციით, ისინი თეირანთან რაიმე სახის შეთანხმების წინააღმდეგ გამოვიდნენ.

საქმის კურსში მყოფ პირთა ინფორმაციით, შუამავლები, მათ შორის კატარი, უკვე მომავალ კვირაში ომანში მოლაპარაკებების ახალი რაუნდის გამართვას ცდილობენ. მიზანია, ვაშინგტონი და თეირანი ჰორმუზის სრუტის გახსნაზე შეთანხმდნენ და ომის დასრულების პროცესი დაიწყონ. აშშ-ის პრეზიდენტმა დონალდ ტრამპმა სამშაბათს განაცხადა, რომ მისი აზრით, მხარეები მალე კვლავ შეხვდებიან.

სპარსეთის ყურის ქვეყნები ძირითადად თანხმდებიან, რომ ტრამპმა ირანის წინააღმდეგ სამხედრო მოქმედებები არ უნდა გააფართოოს. თუმცა, საუდის არაბეთი და არაბთა გაერთიანებული საამიროები ტრამპის ადმინისტრაციას მოუწოდებენ, ირანზე ეკონომიკური ზეწოლა შეინარჩუნოს და არ დათანხმდეს ისეთ დათმობებს, რომლებიც სანქციებს ან აშშ-ის საზღვაო ბლოკადას შეამსუბუქებს.

განსაკუთრებით რთულ ვითარებაშია საუდის არაბეთი, რომელსაც ნავთობის მსოფლიო ბაზრებზე გატანის ახალი პრობლემები შეექმნა მას შემდეგ, რაც ირანის მოკავშირე „ჰუსიტებმა“ იემენში სამეფოს ნავთობის გადაზიდვების შეფერხება დაიწყეს წითელი ზღვის გავლით, წერს The Wall Street Journal-ი.

სპარსეთის ყურის ქვეყნების ზეწოლა იმ დაბრკოლებების ჩამონათვალს ემატება, რომლებიც აშშ-სა და ირანს შორის შეთანხმების მიღწევას ართულებს. მათ შორისაა თავად ტრამპის განწყობა, შეინარჩუნოს ბლოკადა; თეირანში არსებული შიში, რომ მოლაპარაკებები შესაძლოა, მხოლოდ დროის გაწელვის მცდელობა იყოს, რათა აშშ-ის შუალედური არჩევნები დასრულდეს და ვაშინგტონმა შემდეგ კვლავ განაახლოს შეტევა; ასევე ირანელი რადიკალების სულ უფრო ხისტი პოზიცია, მაშინ როდესაც აშშ-ის ეკონომიკური ზეწოლა ძლიერდება.

თეთრი სახლის წარმომადგენელმა განაცხადა, რომ სანქციებმა და ბლოკადამ აშშ ირანთან მიმართებით, „ძლიერ პოზიციაში“ ჩააყენა.

„პრეზიდენტი ტრამპი მზად არის, შესაბამის პირობებში ირანთან ისაუბროს, თუმცა მას ირანელებთან მოლაპარაკების საჭიროება არ აქვს“, - განაცხადა თეთრი სახლის წარმომადგენელმა.

საუდის არაბეთის ხელმძღვანელობით, არაბული ქვეყნები ზაფხულის განმავლობაში ირანთან მოლაპარაკებების დაწყებას აქტიურად უჭერდნენ მხარს და მზად იყვნენ, განეხილათ შეთანხმებაც კი, რომელიც თეირანის გარკვეულ გავლენას ჰორმუზის სრუტეზე აღიარებდა. აღნიშნული საზღვაო მარშრუტი მათი ნავთობის ექსპორტისთვის სასიცოცხლოდ მნიშვნელოვანია.

თუმცა, საქმის კურსში მყოფ პირთა ინფორმაციით, ირანის მიერ სრუტეში საუდის არაბეთის გემებზე განხორციელებულმა თავდასხმებმა და ირანის მიერ მხარდაჭერილი „ჰუსიტების“ წახალისებამ, შეეწყვიტათ ალტერნატიული მარშრუტით, ანუ წითელი ზღვით გადაზიდვები, სპარსეთის ყურის ქვეყნებში გააჩინა ეჭვი, რომ ირანი შეთანხმების მიღწევას რეალურად არ ცდილობს.

ამ პოზიციას იზიარებს საუდის არაბეთის მემკვიდრე პრინცი მუჰამედ ბინ სალმანიც. რამდენიმე წყაროს ცნობით, მან ცოტა ხნის წინ ამერიკელ მაღალჩინოსნებს განუცხადა, რომ აშშ-მა ბლოკადა უნდა გააგრძელოს მანამ, ვიდრე ირანი ახალი შეთანხმების ხელმოწერას არ დათანხმდება.

არაბთა გაერთიანებული საამიროების წარმომადგენლებმაც, რომლებიც ადრე აცხადებდნენ, რომ მათი ქვეყანა კონფლიქტის დიპლომატიური გზით დასრულებით იყო დაინტერესებული, ირანთან მოლაპარაკებების განახლების მოლოდინი შეამცირეს. მათი თქმით, რეგიონში ძალადობის ახალი გამწვავება და გემებზე თავდასხმები აჩვენებს, რომ თეირანი დიპლომატიურ პროცესში სწრაფად დაბრუნებას არ აპირებს.