The Telegraph: მრჩევლები ენდი ბერნემს ვადამდელი არჩევნების ჩატარებისკენ უბიძგებენ

დაუნინგ სთრითის მრჩევლები მომავალ წელს დიდ ბრიტანეთში ვადამდელი საპარლამენტო არჩევნების ჩატარებას ემხრობიან. ინფორმაციას The Telegraph-ი საკუთარ წყაროებზე დაყრდნობით ავრცელებს.

დიდი ბრიტანეთის პრემიერ-მინისტრის ენდი ბერნემის გუნდის რამდენიმე გავლენიანი წევრი მიიჩნევს, რომ არჩევნების გაზაფხულზე დანიშვნა „ლეიბორისტულ პარტიას“ მორიგი საპარლამენტო უმრავლესობის მოპოვების საუკეთესო შანსს მისცემს.

ხუთშაბათს გამოქვეყნებული YouGov-ის კვლევის თანახმად, არჩევნები ხვალ რომ ჩატარებულიყო, „ლეიბორისტები“ კვლავ ყველაზე დიდ პარტიად დარჩებოდნენ, თუმცა უმრავლესობის მოსაპოვებლად საჭირო რაოდენობას 85 მანდატით ჩამორჩებოდნენ.

შოტლანდიის „ეროვნული პარტიის“ (SNP) ლიდერ ჯონ სვინისთან და „ლიბერალ-დემოკრატების“ ლიდერ სერ ედ დეივისთან დაახლოებულმა წყაროებმა არ გამორიცხეს შესაძლებლობა, რომ მომავალ არჩევნებში მათი პარტიების მიერ მოპოვებული მანდატების ნაწილით მათ „ლეიბორისტებს“ დაუჭიროს მხარი, რათა ბერნემმა პრემიერ-მინისტრის პოსტი შეინარჩუნოს.

მთავრობის ერთ-ერთმა მაღალჩინოსანმა The Telegraph-ს განუცხადა, რომ არჩევნების ვადებთან დაკავშირებით მთავრობაში „აზრთა სხვადასხვაობაა“, თუმცა „ლეიბორისტები“ „ყველა შესაძლო სცენარის განხილვის გარეშე გულუბრყვილოები იქნებიან“.

გაზაფხულზე არჩევნების ჩატარების მომხრეები, როგორც ცნობილია, მიიჩნევენ, რომ „ლეიბორისტული პარტიის“ 2024 წლის საარჩევნო მანიფესტი პოლიტიკურ გაერთიანებას გარკვეულწილად ზღუდავს. საუბარია მკაცრ „წითელ ხაზებზე“ გადასახადებთან, ფისკალურ წესებთან და ბრიტანეთის ევროკავშირის საბაჟო კავშირსა და ერთიან ბაზარზე დაბრუნებასთან დაკავშირებით.

თუმცა, ვადამდელი არჩევნების მომხრეები მიიჩნევენ, რომ ბერნემი არჩევნების დანიშვნას მხოლოდ იმ შემთხვევაში შეძლებს, თუ ახლო აღმოსავლეთში კრიზისი მოგვარდება, რაც ენერგიის ფასების შემცირებას გამოიწვევს, და მთავრობა პოპულარული პოლიტიკის განხორციელებას შეძლებს.