მაკრონი: ინფორმაცია რუსეთში დამატებით 300 000 ადამიანის შესაძლო მობილიზების შესახებ დამაჯერებლად გამოიყურება

საფრანგეთის პრეზიდენტმა, ემანუელ მაკრონმა რუსეთიდან მომდინარე საფრთხეებსა და მოსალოდნელ ახალ მობილიზაციაზე ისაუბრა. მისი განცხადებით, ინფორმაცია რუსეთში დამატებით 300 000 ადამიანის შესაძლო მობილიზების შესახებ დამაჯერებლად გამოიყურება.

„ეს სრულიად სავარაუდოა. გახდის თუ არა რუსეთი ამას საჯაროს, სხვა საკითხია, თუმცა დღეს გავრცელებული ცნობები სწორედ 300 000 კაცის მობილიზებაზე მიუთითებს“, - აღნიშნა მაკრონმა.

საფრანგეთის პრეზიდენტმა ხაზი გაუსვა, რომ პარიზი არ ცდილობს რიტორიკის ესკალაციას, თუმცა რეალობას თვალი უნდა გაუსწოროს: „რუსეთი სულ უფრო მეტ მტრულ და კრიმინალურ ქმედებას სჩადის“.

მაკრონის თქმით, საფრანგეთში ჯერ არ დაფიქსირებულა ისეთი ტიპის თავდასხმები, როგორიც ლაიფციგში მოხდა, თუმცა ქვეყანა საფრთხეების ევოლუციას მზადყოფნაში ხვდება.

უსაფრთხოების ზომები უკვე რამდენიმე თვეა გაძლიერებულია - ამოქმედებულია დეზინფორმაციასთან ბრძოლის პლატფორმა Viginum-ი, ხოლო რეგიონულ დონეზე სამოქალაქო და სამხედრო ობიექტების დაცვა დამატებით გაძლიერდა.