დავით ნარმანია: არაერთი დაინტერესებული ინვესტორი მოდის მარეგულირებელ კომისიაში, მათ ვაძლევთ განმარტებებს ჩვენი ქვეყნის მარეგულირებელ ნორმებთან და კანონმდებლობასთან დაკავშირებით - ისინი უზრუნველყოფილი არიან სწორედ მარეგულირებელი გარემოთი და ეს არის დამატებითი ფაქტორი იმისათვის, რომ ქვეყანაში ინვესტირებასთან დაკავშირებით გადაწყვეტილებები მიიღონ

ზოგადად ქვეყანაში არსებული ლიბერალური და ხელშემწყობი ბიზნესგარემო არის ძალიან დიდი და მნიშვნელოვანი ფაქტორი, - განაცხადა საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარე, დავით ნარმანიამ გადაცემაში „დღის ქრონიკა“ პასუხად კითხვაზე, რა შეიძლება იზიდავდეს ინვესტორებს საქართველოში ენერგეტიკის სფეროში.

მისივე შეფასებით, კიდევ ერთი მნიშვნელოვანი ფაქტორი მოწესრიგებული მარეგულირებელი ნორმები და კანონმდებლობაა.

„არაერთი დაინტერესებული ინვესტორი მოდის მარეგულირებელ კომისიაში. კვირა ისე არ გავა, რომ ჩვენ 2-3 სამუშაო შეხვედრა მათთან არ გავმართოთ და ვაძლევთ მათ განმარტებებს ჩვენი ქვეყნის მარეგულირებელ ნორმებთან და კანონმდებლობასთან დაკავშირებით. ისინი ნახულობენ, რომ ყველაფერი ჩვენს მარეგულირებელ ნორმებში დეტალურად არის გაწერილი. შესაბამისად, ისინი უზრუნველყოფილი არიან სწორედ მარეგულირებელი გარემოთი და ეს არის დამატებითი ფაქტორი იმისათვის, რომ ქვეყანაში ინვესტირებასთან დაკავშირებით გადაწყვეტილებები მიიღონ.

[ინვესტორებმა] იციან, რომ მარეგულირებელი კომისია ენერგეტიკის სექტორში ენერგიის წარმოების ლიცენზიას გასცემს მკაფიო საჯარო ადმინისტრაციული წესებით და პროცედურებით. მათ იციან, რომ ტარიფები, რომლებსაც ჩვენ ვადგენთ, სპეციალური ფორმულის საფუძველზეა გაანგარიშებული. მათ ასევე ძალიან კარგად იციან, რომ ჩვენ გვაქვს ბაზრის მონიტორინგის წესები და რეგულაციები, რომლებიც ევროპის ბაზრის რეგულირების ძირითად ჩარჩოს ეფუძნება. მათ ასევე ძალიან კარგად იციან, რომ თუ არათანაბარი თამაშის წესები იქნება ენერგეტიკის სექტორში და ვინმე დაარღვევს კანონმდებლობას, გვაქვს ასევე მკაფიო ადმინისტრაციული მექანიზმები დაჯარიმებასთან დაკავშირებით. მათ ასევე იციან, რომ ჩვენ ვართ მომხმარებელსა და მიმწოდებელს შორის დავების განხილვის პირველი ინსტანცია, სადაც პროცედურები არის ძალიან, დავების განხილვა ხდება ყოველგვარი ბაჟის და საფასურის გადახდის გარეშე. როდესაც ამ ყველაფერს იგებენ, მოწესრიგებულ და ღია ბიზნესგარემოსთან ერთად, ეს არის მნიშვნელოვანი ფაქტორი საინვესტიციო გადაწყვეტილებების მისაღებად“, - განაცხადა სემეკ-ის თავმჯდომარემ.