ავთანდილ კასრაძე: დარწმუნებული ვართ, გაეროს ტურიზმის ორგანიზაციასთან ერთად ძალიან ბევრი ინოვაციური პროექტები განხორციელდება და ქართული სტარტაპები მსოფლიო ტურიზმის ტექნოლოგიურ განვითარებაში მნიშვნელოვან წვლილს შეიტანენ

გაეროს ტურიზმის ორგანიზაციის გენერალურ მდივანთან შეხვედრაზე ძალიან მაღალ დონეზე წარმოჩინდა ქართული ინოვაციური ეკოსისტემა, - ამის შესახებ საქართველოს ინოვაციების და ტექნოლოგიების სააგენტოს თავმჯდომარემ ავთანდილ კასრაძემ ქუთაისის ტექნოლოგიურ ჰაბში შაიხა ნასერ ალ ნუვასის ვიზიტისას განაცხადა.

ვიზიტის ფარგლებში სტუმრებმა ქუთაისის ტექნოლოგიურ ჰაბის სამეცნიერო ტექნოლოგიური მუზეუმი დაათვალიერეს, გაეცნენ თუმოს საერთაშორისო სკოლას, წამყვან ტექნოლოგიურ ლაბორატორიებს, ასევე დაათვალიერეს ვირტუალური რეალობის ლაბორატორია, რომელიც ტურიზმის სფეროში ძალიან აქტიური ტექნოლოგიების შემოქმედია.

„ძალიან საინტერესო და ინტერაქციული შეხვედრა გაიმართა ქართულ ინოვაციურ მაღალტექნოლოგიურ სტარტაპებთან. ვიზიტის ფარგლებში მაღალ დონეზე წარმოჩინდა ქართული ინოვაციური ეკოსისტემა და დარწმუნებული ვართ გაეროს ტურიზმის ორგანიზაციასთან ერთად ძალიან ბევრი ინოვაციური, ტექნოლოგიური პროექტები განხორციელდება და ქართული სტარტაპები მსოფლიო ტურიზმის ტექნოლოგიურ განვითარებაში მნიშვნელოვან წვლილს შეიტანენ“, - განაცხადა ავთანდილ კასრაძემ.