ინგა ფხალაძე: იმ მიზნებისთვის, რომ საქართველო გახდეს არა მხოლოდ სატრანზიტო ჰაბი, არამედ საექსპორტო ჰაბიც, ძალიან დიდი მნიშვნელობა ექნება დიდი ჰესების განვითარებას საქართველოსთვის

იმ მიზნებისთვის, რომ საქართველო გახდეს არა მხოლოდ სატრანზიტო ჰაბი, არამედ საექსპორტო ჰაბიც, ძალიან დიდი მნიშვნელობა ექნება დიდი ჰესების განვითარებას საქართველოსთვის, - განაცხადა „დღის ქრონიკასთან“ ეკონომიკისა და მდგრადი განვითარების მინისტრის მოადგილემ ინგა ფხალაძემ.

მისი თქმით, იმისთვის, რომ ქვეყანა ენერგეტიკული მიმართულებით არ იყოს იმპორტზე დამოკიდებული, დიდი ჰესების განვითარება მნიშვნელოვანია.

„დიდი ჰესები ძალიან მნიშვნელოვანია სისტემის სტაბილურობისთვის. ჩვენი პოტენციალი ძალიან მაღალია ჰიდრორესურსების თვალსაზრისით. როგორც მოგეხსენებათ, დღევანდელი გენერაციის 80% მოდის ჰიდრორესურსებზე. იმისთვის, რომ უზრუნველყოფილი იყოს სისტემის სტაბილურობა, უნდა მოხდეს სისტემაში დივერსიფიკაცია. დივერსიფიკაცია გულისხმობს სხვა წყაროების განვითარებასაც, ეს გახლავთ მზე და ქარი. აქ ჩვენ პროცენტულად ყველაფერი თანაბრად გვაქვს გადანაწილებული.

დიდი ჰესების წვლილი გენერაციაში არა მხოლოდ საინჟინრო მნიშვნელობით განისაზღვრება, აქ ძალიან მნიშვნელოვანი გახლავთ ის ფაქტორი, რომ სისტემის სტაბილურობა უზრუნველყოფილი იქნება იმ ჰესებით, რომლებსაც აქვთ რეზერვუარები.

იმისთვის, რომ უზრუნველვყოთ ჩვენ პიკურ საათებში მომხმარებლის დაკმაყოფილება და შევამციროთ ამის გამო ჩვენი იმპორტზე დამოკიდებულება, მნიშვნელოვანია გვქონდეს დიდი ჰესები“, - განაცხადა ინგა ფხალაძემ.

მან ისაუბრა იმ მასშტაბურ პროექტებზე, რომელიც საქართველოს არა მხოლოდ სატრანზიტო, არამედ საექსპორტო ჰაბად აქცევს.

„როდესაც ჩვენ ვსაუბრობთ დიდ ჰესებზე, ძალიან მნიშვნელოვანია, რომ საქართველო თავის ენერგეტიკულ განვითარებაში არა მხოლოდ გენერაციის ზრდას გულისხმობს, არამედ გულისხმობს იმას, რომ ადგილობრივად წარმოებული ელექტროენერგია მიწოდებული იქნება როგორც საექსპორტოდ ევროპისათვის. ვინაიდან ჩვენ გვაქვს გათვალისწინებული ძალიან დიდი მასშტაბური პროექტების განხორციელება, რომელიც გახლავთ შავი ზღვის წყალქვეშა კაბელი ანუ გადამცემი ხაზი, რომელიც 1300 მეგავატიან სიმძლავრეს გაატარებს რუმინეთის მიმართულებით. ასევე, ჩვენ მოვიაზრებთ კიდევ ორ ძალიან დიდ პროექტს, რომელიც გახლავთ მწვანე ენერგიის კორიდორი, ეს გახლავთ 4 ქვეყნის ინიციატივა - საქართველო, აზერბაიჯანი, რუმინეთი და უნგრეთი, სადაც 4 ათასი მეგავატის სიმძლავრის კაბელზეა საუბარი, რომელიც მიაწოდებს ელექტროენერგიას საქართველოს გავლით ევროპულ ბაზრებს. უკვე ჩამოყალიბების პროცესში გახლავთ ერთობლივი საწარმო. ეს გახლავთ საქართველო, თურქეთი და ბულგარეთი. ეს გახლავთ სახმელეთო კორიდორი. სწორედ იმ მიზნებისთვის, რომ საქართველო გახდეს არა მხოლოდ სატრანზიტო ჰაბი, არამედ საექსპორტო ჰაბიც, ძალიან დიდი მნიშვნელობა ექნება დიდი ჰესების განვითარებას საქართველოსთვის“, - განაცხადა ინგა ფხალაძემ.