გენერალური პროკურატურის შუამდგომლობის საფუძველზე, არგენტინიდან ტრანსნაციონალურ ორგანიზებულ დანაშაულში ბრალდებული გიორგი ხატიაშვილის ექსტრადირება განხორციელდა

გენერალური პროკურატურის შუამდგომლობის საფუძველზე, არგენტინიდან ტრანსნაციონალურ ორგანიზებულ დანაშაულში ბრალდებული გიორგი ხატიაშვილის ექსტრადირება განხორციელდა. ეს არის პირველი ექსტრადაციის საქმე, რომელიც ევროპისა და რეგიონის მიღმა ქვეყნებიდან განხორციელდა. პროკურატურის ინფორმაციით, ხატიაშვილი თანამზრახველებთან ერთად დანაშაულებრივ ჯგუფს ქმნიდა, რომლის წევრებიც ფინანსური სარგებლის სანაცვლოდ აშშ-ში თავშესაფრისა და ვიზის მიღებაში დახმარებას ჰპირდებოდნენ საქართველოს მოქალაქეებს. ამისთვის ისინი ყალბ ისტორიებსა და ოფიციალურ დოკუმენტებს ამზადებდნენ. საქმეზე პასუხისგებაში 9 მოქალაქეა მიცემული. გამოძიების ცნობით, ჯგუფის წევრებმა დაახლოებით 600 ათასი ლარი, 2 მილიონ 250 ათასი დოლარი და 12 500 ევრო მიიღეს. ამავე საქმეზე ძებნილი კიდევ ერთი მოქალაქის ექსტრადირება კი გერმანიიდან განხორციელდა.