ევროპარლამენტმა ე.წ. ჩატ კონტროლის გახანგრძლივების გადაწყვეტილება „უკანა კარის“ გავლით მიიღო

ევროპარლამენტმა ე.წ. ჩატ კონტროლის გახანგრძლივების გადაწყვეტილება „უკანა კარის“ გავლით მიიღო. ამის შესახებ „ევრონიუსი“ წერს. სტატიაში ნათქვამია, რომ პირადი მიმოწერების მასობრივი სკანირების მოქმედების ვადის გახანგრძლივების შესახებ გადაწყვეტილება საპარლამენტო პროცედურაში არსებული მექანიზმის გამოყენებით მიიღეს და რეგულაციის არსზე პირდაპირი კენჭისყრა არ ჩატარებულა. „ჩატ კონტროლი“ დროებითი გამონაკლისია, რომელიც ონლაინსივრცეში ბავშვთა მიმართ სექსუალური ძალადობის მასალების გამოვლენას ისახავს მიზნად. მარტში ევროპარლამენტმა გამონაკლისის მოქმედების ვადის გახანგრძლივებას მხარი არ დაუჭირა, ივნისის ბოლოს კი ევროპარლამენტის პრეზიდენტმა რობერტა მეცოლამ საკითხი ხელახლა დააბრუნა დღის წესრიგში და ევროკავშირის საბჭოს გადაუგზავნა იმ მოტივით, რომ რეგულაციის ვადის გასვლამ ბავშვების ონლაინდაცვის მიმართულებით სახიფათო სამართლებრივი ვაკუუმი შექმნა. ამის შემდეგ ევროკავშირის საბჭომ დოკუმენტი კვლავ ევროპარლამენტს დაუბრუნა. კენჭისყრაზე 314 დეპუტატმა წინააღმდეგ მისცა ხმა, ხოლო 276-მა მხარი დაუჭირა წინადადებას. იმის მიუხედავად, რომ უმრავლესობა რეგულაციის წინააღმდეგი იყო, მის სრულად დასაბლოკად საჭირო იყო აბსოლუტური უმრავლესობა - 361 ხმა, თუმცა ოპონენტებმა ხმების საკმარისი რაოდენობა ვერ მოაგროვეს. შედეგად, რეგულაციის მოქმედების ვადა 2028 წლის 3 აპრილამდე გახანგრძლივდა.