პაატა სალია: ჩვენი თვითმიზანი არ არის, ციხეების რაოდენობა გავზარდოთ, ჩვენი მიზანია ძველი დაწესებულებები თანამედროვე ტიპის დაწესებულებებით შევცვალოთ

ჩვენი თვითმიზანი არ არის ციხეების რაოდენობა გავზარდოთ. ჩვენი მიზანია, რომ ძველი, ნახევრად ღია ტიპის დაწესებულებები შევცვალოთ თანამედროვე ტიპის მცირე ზომის დაწესებულებებით, - განაცხადა საქართველოს იუსტიციის მინისტრმა პენიტენციურ სისტემაში დაგეგმილ ინფრასტრუქტურულ პროექტებზე ტელეკომპანია „იმედის“ გადაცემა „ღია ეთერში“.

მინისტრის განმარტებით, ახალი, თანამედროვე ტიპის დაწესებულებები 300-დან 500-მდე ადამიანისთვის იქნება გათვალისწინებული. პაატა სალიამ ლაითურის პენიტენციურ დაწესებულებაზეც გაამახვილა ყურადღება.

„ლაითურის დაწესებულება 700 პატიმრისთვისაა განკუთვნილი და მსგავსი ინფრასტრუქტურით შეიძლება ბევრმა ქვეყანამ ვერ დაიკვეხნოს. ახლა დავასრულეთ რუსთავში 150-კაციანი ციხის მშენებლობა და უახლოეს მომავალში პატიმრებს უკვე მასში გადავანაწილებთ“, - განაცხადა იუსტიციის მინისტრმა.