რევაზ სოხაძე: დღევანდელი გეგმით, დაახლოებით 2030-31 წელს აღმოსავლეთ-დასავლეთის მიმართულებით დამაკავშირებელი დერეფანი სრულად უნდა დასრულდეს და ყველა მონაკვეთი უნდა იყოს აშენებული

დღევანდელი გეგმით, დაახლოებით 2030-31 წელს აღმოსავლეთ-დასავლეთის მიმართულებით დამაკავშირებელი დერეფანი სრულად უნდა დასრულდეს და ყველა მონაკვეთი უნდა იყოს აშენებული, - განაცხადა საქართველოს ინფრასტრუქტურის მინისტრმა რევაზ სოხაძემ „დღის ქრონიკაში“.

მინისტრმა დაგეგმილ ინფრასტრუქტურულ პროექტებზე ისაუბრა.

„რამდენიმე დღის წინ ძალიან მნიშვნელოვან დოკუმენტს მოვაწერეთ ხელი. კონტრაქტორი რამდენიმე დღეში დაიწყებს სამობილიზაციო სამუშაოებს. მივიღებთ თბილისის შემოვლითი გზის მშენებლობას, რომელიც ასევე წელს დაიწყება. საბოლოო ჯამში, როდესაც მშენებლობები დასრულდება, მივიღებთ ქვეყნისთვის უმნიშვნელოვანეს პროექტს, რომელიც ჩვენს სატრანზიტო ფუნქციას კიდევ ერთხელ განამტკიცებს. კონკრეტულად სარფის მონაკვეთი არის 11.3 კმ სიგრძის, აქედან 7.6 კმ არის გვირაბი, რომელიც მეორე იქნება სიდიდით საქართველოში, მას შემდეგ, რაც აშენდა კობი-ქვეშეთის მონაკვეთზე 9-კილომეტრიანი გვირაბი. ამ მონაკვეთზე გვაქვს სამი ხიდი. ეს მთლიანად აარიდებს სატრანზიტო მოძრაობას ტურისტულ ზონას - ეს არის გონიო-კვარიათის ზონა. 48 თვეში უნდა დასრულდეს აღნიშნული პროექტი და ეს იქნება კიდევ ერთი წინ გადადგმული ნაბიჯი ჩვენი ქვეყნისთვის.

დღევანდელი გეგმით, დაახლოებით 2030-31 წელს აღმოსავლეთ-დასავლეთის მიმართულებით დამაკავშირებელი დერეფანი სრულად უნდა დასრულდეს და ყველა მონაკვეთი უნდა იყოს აშენებული, თუმცა ეს არ არის ის პროექტები მხოლოდ, რომელსაც ჩვენ ვახორციელებთ. იცით, რომ სტეფანწმინდის მიმართულებით ასევე მიმდინარეობს აქტიური სამშენებლო სამუშაოები კობი-ქვეშეთის მონაკვეთზე. უახლოეს დღეებში გამოვაცხადებთ ტენდერს სტეფანწმინდის შემოვლითი გზის მშენებლობაზეც, ასევე ფასანაურში გვირაბთან დაკავშირებითაც მიმდინარეობს აქტიური სამუშაოები, მათ შორის ადგილობრივებთან აქტიური კომუნიკაცია და დიდი იმედი მაქვს, მომავალ წელს ამ სამუშაოს დაწყებასაც შევძლებთ“, - აღნიშნა სოხაძემ.