სარწყავი სეზონის მიმდინარეობის საკითხებზე ფერმერებთან შეხვედრა გაიმართა

სარწყავი სეზონის შეუფერხებლად წარმართვისა და წყალმომხმარებლების საჭიროებების ადგილზე გაცნობის მიზნით, შპს „საქართველოს მელიორაციის“ წარმომადგენლები რეგიონებში ფერმერებთან შეხვედრებს მართავენ. ინფორმაციას გარემოს დაცვისა და სოფლის მეურნეობის სამინისტროს პრესსამსახური ავრცელებს.

კომპანიის კომერციული დირექტორი მამელი ქობალია გარდაბნის მუნიციპალიტეტის სოფელ სართიჭალაში ადგილობრივ ფერმერებს შეხვდა. შეხვედრაზე მხარეებმა სარწყავი ინფრასტრუქტურის მდგომარეობა, წყლის მიწოდების საკითხები და წყალმომხმარებლებისთვის მომსახურების გაუმჯობესების შესაძლებლობები განიხილეს. ასევე ყურადღება გამახვილდა თანამედროვე სარწყავი ტექნოლოგიების გამოყენების მნიშვნელობაზე.

„სარწყავი სეზონის შეუფერხებლად წარმართვისთვის „საქართველოს მელიორაცია“ ყოველდღიურ რეჟიმში აკვირდება წყლის მიწოდების პროცესს და ფერმერებისგან მიღებულ ინფორმაციაზე ოპერატიულად რეაგირებს. ჩვენთვის მნიშვნელოვანია, ადგილზე ვიცოდეთ, რა საჭიროებები აქვთ წყალმომხმარებლებს და რა მიმართულებით არის საჭირო გაუმჯობესება. ამასთან, ფერმერებს ვუზიარებთ ინფორმაციას თანამედროვე სარწყავი ტექნოლოგიების, მათ შორის წვეთოვანი მორწყვის შესაძლებლობების შესახებ, რომელიც წყლის რესურსის ეფექტიან გამოყენებასთან ერთად მოსავლიანობის გაზრდასაც უწყობს ხელს“, - განაცხადა მამელი ქობალიამ.

ფერმერებთან შეხვედრების ფარგლებში, შპს „საქართველოს მელიორაცია“ ადგილზე იღებს ინფორმაციას სარწყავი სეზონის მიმდინარეობის შესახებ, აფასებს ინფრასტრუქტურის მდგომარეობას და წყალმომხმარებლების საჭიროებებს. მიღებული ინფორმაციის საფუძველზე შესაბამისი ღონისძიებები იგეგმება და ხორციელდება.