ევროპარლამენტარი ჰელმუტ ბრანდშტეტერი: ყველა პოლიტპატიმარი, ელენე ხოშტარიას ჩათვლით, გათავისუფლდება

„ქართული ოცნება“ ქართველი ხალხისთვის კოშმარად იქცა - საქართველოს ოლიგარქი ოპოზიციურ პარტიებს კრძალავს, - განაცხადა ევროპარლამენტის წევრმა ჰელმუტ ბრანდშტეტერმა.

„ეს ჩვენ ვიხილეთ ბელარუსშიც. ორი დიქტატორი, პუტინისადმი ლოიალური ორი რეჟიმი, ორი ადამიანი, რომლებსაც საკუთარი მოქალაქეები მძევლებად ჰყავთ აყვანილი. ორივე რეჟიმი ციხეში სვამს პოლიტიკურ ოპონენტებს, ორივე მოსკოვის ბრძანებით მოქმედებს, ორივე კლავს საკუთარი ერის მომავალს. პუტინის მსგავსად, მათ უბრალოდ ეშინიათ თავისუფლების, ეშინიათ სიტყვის თავისუფლების. ახლა კი, პუტინისა და ლუკაშენკოს მსგავსად, ისინი ასევე აძევებენ ევროპულ ფონდებს. ამ ორგანიზაციებმა თავისი წვლილი შეიტანეს საქართველოს წარმატებაში ბოლო ათწლეულების განმავლობაში. ირონია კი ის არის, რომ ზოგიერთი მათგანი სწორედ ამ ორგანიზაციებში მუშაობდა და სწავლობდა, ანუ მათ ისწავლეს დემოკრატია იმისთვის, რომ მოგვიანებით ის დაენგრიათ. კოლეგებო, საქართველოს ხალხი საერთოდ არ ჰგავს ამ რეჟიმს. ისინი არიან ევროპელები, რომლებიც, დარწმუნებული იყავით, ისევე როგორც ჩვენ, უწყვეტად იბრძვიან თავისუფლებისთვის და ევროპული მომავლისთვის. ასე რომ, მე ოპტიმისტურად ვარ განწყობილი, რადგან ყველა სისხლიანი რეჟიმი ეცემა. ყველა პოლიტპატიმარი, ელენე ხოშტარიას ჩათვლით, გათავისუფლდება, ხოლო მათ, ვინც ქართველი ხალხის ნაცვლად რუსეთს ემსახურებოდა, მაღალი ფასი უნდა გადაიხადონ თავიანთი ღალატისთვის“, - დასძინა მან.