რატომ გადაწყდა 2014 წელს თელეთში 1 კვადრატული მეტრი მიწის 1 დოლარად გასხვისება ესტონელ ბიზნესმენზე - „იმედის კვირამ“ დიმიტრი ქუმსიშვილისაგან და გიორგი კვირიკაშვილისაგან კითხვებზე პასუხები ვერ მიიღო

„იმედის კვირამ“ სცადა გაერკვია, როგორ იყიდა 2014 წელს თელეთში ესტონელმა ბიზნესმენმა 331 ჰექტარი 9 მილიონ ლარად - ანუ იმ მიწის ნაკვეთზე, სადაც მშენებლობა ნებადართულია, 1 კვადრატულ მეტრში 1 დოლარი გადაიხადა.

ამ საკითხით „იმედის კვირა“ სტუდია „მონიტორის“ იმ რეპორტაჟის შემდეგ დაინტერესდა, რომელშიც აღნიშნული ნაკვეთის ნაწილის ბიზნესმენ ვანო ჩხარტიშვილის კომპანიის მიერ 2026 წელს შეძენის შესახებ შეთქმულების თეორიაა განვითარებული. თუკი სტუდია „მონიტორის" მიერ მოყოლილ ამბავში რაიმეს უნდა დაემსახურებინა გამომძიებელი ჟურნალისტის ყურადღება და გამოეწვია ეჭვი, ეს 2014 წლის ხელშეკრულებაა, რომელიც ესტონელ ბიზნესმენსა და ეკონომიკის სამინისტროს შორის გაფორმდა.

იმ პერიოდში ეკონომიკის მინისტრი გიორგი კვირიკაშვილია, მისი მოადგილე დიმიტრი ქუმსიშვილი, ხოლო პრემიერ-მინისტრი ირაკლი ღარიბაშვილი.

„იმედის კვირამ“ ეკონომიკის მინისტრის იმჟამინდელ მოადგილე დიმიტრი ქუმსიშვილთან დაკავშირება სცადა, რათა გაერკვია, რატომ გადაწყდა თავის დროზე უნიკალური მიწის გასხვისება მიზერულ ფასად?

„სალამი, ბატონო დიმიტრი. „იმედის კვირიდან“ გწერთ. საგამოძიებო რეპორტაჟს ვამზადებთ ოლეგ ოსინოვსკის მიერ 2014 წელს განხორციელებულ ინვესტიციაზე. ბიზნესმენი ინტერვიუებში თქვენ გასახელებთ, როგორც სახელმწიფოს წარმომადგენელს მოლაპარაკებებისას. გვსურს თქვენთვის რამდენიმე კითხვის დასმა. გვინდა თქვენი პოზიცია გავიგოთ”, - მიმართა
„იმედის კვირამ“ ქუმსიშვილს.

მისი პასუხი ასეთი იყო: „თქვენს ტელევიზიას პატივს ვცემ. ფაქტების დასაზუსტებლად უმჯობესია, ეკონომიკის სამინისტროს მიმართოთ“.

არაერთი თხოვნის მიუხედავად, „იმედის კვირამ“ ქუმსიშვილისგან ინტერვიუზე თანხმობა ვერ მიიღო და პარალელურად, დაკავშირება სცადა იმჟამინდელ ეკონომიკის მინისტრთან და შემდეგ პრემიერ-მინისტრ გიორგი კვირიკაშვილთან. როდესაც თემის დეტალები შეიტყო, საუბარი არც კვირიკაშვილმა ისურვა: „უკაცრავად, ვერ გპასუხობთ, მომწერეთ და დაგირეკავთ. მადლობა“.

კითხვით, თუ როგორ მოხვდა თავის დროზე მის ხელში პრესტიჟულ ადგილზე მიწის ნაკვეთი, საუკეთესო ხედებით და მშენებლობის უფლებით ასე იაფად - 1 კვადრატული მეტრი 1 დოლარად, „იმედის კვირამ“ ბიზნესმენ ოსინოვსკისაც მიმართა.

„როგორც მახსოვს, ბატონ კვირიკაშვილს ერთხელ შევხვდი, ამ პროექტის შეძენიდან დაახლოებით ერთი წლის შემდეგ. არასდროს, არც მანამდე და არც მერე, ის აღარ მინახავს. მოლაპარაკებები კონტრაქტის შესახებ მიმდინარეობდა ბატონ ქუმსიშვილთან. 2014 წლისთვის ეს იყო წარმოუდგენლად მაღალი ფასი, ვინაიდან ის, უბრალოდ, მთა იყო, გზების, წყლის, გაზის და ა.შ. გარეშე”, - განაცხადა ბიზნესმენმა.

ესტონელი ბიზნესმენი გარიგების დეტალებზე „იმედის კვირასთან“ სიტყვაძუნწი აღმოჩნდა, თუმცა ამ შეთანხმებაზე თავის დროზე დეტალურად ესაუბრა „ფორბსს“, რომელთანაც აცხადებდა, რომ მას ასეთი სწრაფი ტემპით შეთანხმებისთვის არასდროს მიუღწევია.

„ეკონომიკის მინისტრის მოადგილე დიმიტრი ქუმსიშვილი მოვიდა. სამინისტროს იმ წელს ინვესტიციებისა და მშპ-ის ზრდა ჰქონდა დაგეგმილი. საინვესტიციო ვალდებულებები ძალიან მოკლე დროში უნდა შეგვესრულებინა და გოლფის მოედანი ძალიან მალე უნდა აგვეშენებინა. ბატონი ქუმსიშვილის არგუმენტი იყო, რომ მიწას იაფად ვყიდულობდით. ხელშეკრულების ხელმოწერის შემდეგ მინისტრის მოადგილემ მთავრობის თანხმობა იმავე დღის ბოლოს მიიღო. ეს იყო ყველაზე სწრაფი საინვესტიციო შეთანხმება“, - აცხადებდა ოსინოვსკი 2018 წელს.

მთლიანობაში „მონიტორის“ რეპორტაჟში არის მცდელობა, ფაქტების დამახინჯებით შექმნან სურათი, რომ თითქოს ვანო ჩხარტიშვილისა და ესტონელი ბიზნესმენის გარიგების უკან „ქართული ოცნების“ დამფუძნებელი და საპატიო თავმჯდომარე ბიძინა ივანიშვილი დგას და თითქოს თავის დროზე ივანიშვილისთვის ოსინოვსკის მიერ ნათქვამ უარს მოჰყვა მასზე წნეხი სახელმწიფოს მხრიდან. ყველა ეს ეჭვი ბიზნესმენმა ვანო ჩხარტიშვილმა საკუთარ პასუხში გაფანტა, რომელიც სტუდია „მონიტორმა“ რატომღაც დამალა.

კერძოდ, ვანო ჩხარტიშვილმა აღნიშნა, რომ „მონიტორის“ მიერ მისთვის გაგზავნილი ერთ-ერთი კითხვა ასეთი იყო: „იყო თუ არა ეს ნაკვეთი ივანიშვილების ოჯახის თხოვნით ან დავალებით შეძენილი?“ კითხვებზე ვანო ჩხარტიშვილმა „მონიტორს“ წერილობით უპასუხა და განმარტა, რომ „ნაკვეთი არ შეუძენია ბიძინა ივანიშვილის ან მისი ოჯახის წევრების თხოვნით და მათ აღნიშნულ გარიგებასთან კავშირი არ აქვთ.“

ვანო ჩხარტიშვილი სტუდია „მონიტორის“ მიერ მომზადებულ რეპორტაჟთან დაკავშირებით გავრცელებულ განცხადებაში აღნიშნავს: „სამწუხაროდ, სიუჟეტის ავტორმა, როგორც ჩანს, მიზანმიმართულად დამალა მათი კითხვების პასუხად ჩემ მიერ გაგზავნილი წერილის მთავარი სათქმელი, სადაც დეტალურად განვმარტავდი, როგორც იმას, თუ რა მიზნით შევიძინე აღნიშნული ნაკვეთი, ასევე იმასაც, თუ როგორ განისაზღვრა ამ კონკრეტული მიწის ფასი. თუმცა ჟურნალისტმა ჩემი, ანუ რეალური წყაროს მიერ მიწოდებული ინფორმაცია სრულად არ გაასაჯაროვა და მთელი სიუჟეტი კონსპირაციებზე ააგო“.