რეალურად სცადა თუ არა ესტონელ ბისზმესმენ ოლეგ ოსინოვსკისთან დაკავშირება სტუდია „მონიტორმა“ თელეთში მდებარე მიწის ნაკვეთის შესახებ რეპორტაჟისთვის და როგორ იყიდა ოსინოვსკიმ 2014 წელს 1 კვადრატული მეტრი 1 დოლარად - „იმედის კვირის“ კითხვებს ოსინოვსკიმ უპასუხა

„იმედის კვირა“ სტუდია „მონიტორის“ რეპორტაჟში გადმოცემული ამბის შესახებ სიმართლის დადგენით დაინტერესდა და მაყურებელს უამბო თელეთში მდებარე იმ რეკრეაციულ ზონაზე, რომელიც ბიზნესმენ ვანო ჩხარტიშვილის კომპანიამ ესტონელი ბიზნესმენისგან იყიდა - დაახლოებით 10 ჰექტარი მიწის ფართობი მან არა ბიზნესინტერესებისთვის, არამედ რეკრეაციული ზონის შენარჩუნების მიზნით შეიძინა.

ერთი რამ, რაც ამ ე.წ საგამოძიებო რეპორტაჟში გარკვევით თქვეს, ისაა, რომ თუ უცხოელი ინვესტორი მთაზე საცხოვრებელ კომპლექსს აშენებს, ეს უდიდესი სიკეთეა, ხოლო თუ ამავე ტერიტორიაზე ქართველი ბიზნესმენი რეკრეაციული ზონის მოწყობას გადაწყვეტს - უდიდესი დანაშაული.

რეპორტაჟში ამბობენ, რა ფასად შეიძინა ტერიტორია თავის დროზე - 2014 წელს ესტონელმა ბიზნესმენმა, მან 331 ჰექტარი 9 მილიონ ლარად იყიდა. ანუ იმ მიწის ნაკვეთზე, სადაც მშენებლობა ნებადართულია, 1 კვადრატულ მეტრში 1 დოლარი გადაიხადა, რომლის ღირებულებაც დღეს 200-300 დოლარს შეადგენს.

„მონიტორი“ ამბობს, რომ ოსინოვსკიმ მათ კითხვებს არ უპასუხა. ესტონელ ბიზნესმენს „იმედის კვირამ“ ჰკითხა, თუ რატომ დატოვა „მონიტორის“ კითხვები უპასუხოდ.

ოლეგ ოსინოვსკიმ „იმედის კვირის“ მოკლე ტექსტურ შეტყობინებას ზუსტად ორ წუთში ასე უპასუხა: „უცხო ნომრებს არ ვპასუხობ, არც ესემესი მიმიღია და არც რაიმე შეტყობინება.“

„იმედის კვირამ“ ბიზნესმენ ოსინოვსკის ასევე ჰკითხა, როგორ მოხვდა თავის დროზე მის ხელში პრესტიჟულ ადგილზე მიწის ნაკვეთი, საუკეთესო ხედებით და მშენებლობის უფლებით ასე იაფად - 1 კვადრატული მეტრი 1 დოლარად.

„როგორც მახსოვს, ბატონ კვირიკაშვილს ერთხელ შევხვდი, ამ პროექტის შეძენიდან დაახლოებით ერთი წლის შემდეგ. არასდროს, არც მანამდე და არც მერე, ის აღარ მინახავს. მოლაპარაკებები კონტრაქტის შესახებ მიმდინარეობდა ბატონ ქუმსიშვილთან. 2014 წლისთვის ეს იყო წარმოუდგენლად მაღალი ფასი, ვინაიდან ის, უბრალოდ, მთა იყო გზების, წყლის, გაზის და ა.შ. გარეშე”, - განაცხადა ბიზნესმენმა.

იმ პერიოდში ეკონომიკის მინისტრი გიორგი კვირიკაშვილია, მისი მოადგილე დიმიტრი ქუმსიშვილი, ხოლო პრემიერ-მინისტრი ირაკლი ღარიბაშვილი. ესტონელი ბიზნესმენი გარიგების დეტალებზე „იმედის კვირასთან“ სიტყვაძუნწი აღმოჩნდა, თუმცა ამ შეთანხმებაზე თავის დროზე დეტალურად ესაუბრა „ფორბსს“, რომელთანაც აცხადებდა, რომ მას ასეთი სწრაფი ტემპით შეთანხმებისთვის არასდროს მიუღწევია.

„ეკონომიკის მინისტრის მოადგილე დიმიტრი ქუმსიშვილი მოვიდა. სამინისტროს იმ წელს ინვესტიციებისა და მშპ-ის ზრდა ჰქონდა დაგეგმილი. საინვესტიციო ვალდებულებები ძალიან მოკლე დროში უნდა შეგვესრულებინა და გოლფის მოედანი ძალიან მალე უნდა აგვეშენებინა. ბატონი ქუმსიშვილის არგუმენტი იყო, რომ მიწას იაფად ვყიდულობდით. ხელშეკრულების ხელმოწერის შემდეგ მინისტრის მოადგილემ მთავრობის თანხმობა იმავე დღის ბოლოს მიიღო. ეს იყო ყველაზე სწრაფი საინვესტიციო შეთანხმება“, - აცხადებდა ოსინოვსკი 2018 წელს.

„იმედის კვირამ “კითხვებით მიმართა ჟურნალისტ ცქრიალა შერმადინსაც, რომელიც კადრებში ჩანს და ამ ამბავს მოგვითხრობს. მაგრამ გაირკვა, რომ რეპორტაჟის რეალური ავტორი ნინო ზურიაშვილია და არა ცქრიალა შერმადინი.

მთლიანობაში „მონიტორის“ რეპორტაჟში არის მცდელობა, ფაქტების დამახინჯებით შექმნან სურათი, რომ თითქოს ვანო ჩხარტიშვილისა და ესტონელი ბიზნესმენის გარიგების უკან „ქართული ოცნების“ დამფუძნებელი და საპატიო თავმჯდომარე ბიძინა ივანიშვილი დგას და თითქოს თავის დროზე ივანიშვილისთვის ოსინოვსკის მიერ ნათქვამ უარს მოჰყვა მასზე წნეხი სახელმწიფოს მხრიდან. ყველა ეს ეჭვი ბიზნესმენმა ვანო ჩხარტიშვილმა საკუთარ პასუხში გაფანტა, რომელიც სტუდია „მონიტორმა“ რატომღაც დამალა.

კერძოდ, ვანო ჩხარტიშვილმა აღნიშნა, რომ „მონიტორის“ მიერ მისთვის გაგზავნილი ერთ-ერთი კითხვა ასეთი იყო: „იყო თუ არა ეს ნაკვეთი ივანიშვილების ოჯახის თხოვნით ან დავალებით შეძენილი?“ კითხვებზე ვანო ჩხარტიშვილმა „მონიტორს“ წერილობით უპასუხა და განმარტა, რომ „ნაკვეთი არ შეუძენია ბიძინა ივანიშვილის ან მისი ოჯახის წევრების თხოვნით და მათ აღნიშნულ გარიგებასთან კავშირი არ აქვთ.“

ვანო ჩხარტიშვილი სტუდია „მონიტორის“ მიერ მომზადებულ რეპორტაჟთან დაკავშირებით გავრცელებულ განცხადებაში აღნიშნავს: „სამწუხაროდ, სიუჟეტის ავტორმა, როგორც ჩანს, მიზანმიმართულად დამალა მათი კითხვების პასუხად ჩემ მიერ გაგზავნილი წერილის მთავარი სათქმელი, სადაც დეტალურად განვმარტავდი, როგორც იმას, თუ რა მიზნით შევიძინე აღნიშნული ნაკვეთი, ასევე იმასაც, თუ როგორ განისაზღვრა ამ კონკრეტული მიწის ფასი. თუმცა ჟურნალისტმა ჩემი, ანუ რეალური წყაროს მიერ მიწოდებული ინფორმაცია სრულად არ გაასაჯაროვა და მთელი სიუჟეტი კონსპირაციებზე ააგო“.