ლევან მაჭავარიანი ბახმაროში ჩატარებულ სემინარზე: ეს იყო პოლიტიკური შინაარსის სემინარი და შესაბამისად, ეს ყველაფერი უნდა შეთანხმებულიყო მთავრობასთან

ეს იყო პოლიტიკური შინაარსის სემინარი და შესაბამისად, ეს ყველაფერი უნდა შეთანხმებულიყო მთავრობასთან, - განაცხადა გადაცემაში „იმედის კვირა“ ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა ბახმაროში ჩატარებულ სემინართან დაკავშირებით.

მისივე თქმით, საზოგადოებამ იხილა, სავარაუდოდ, კანონის გვერდის ავლა.

„ბრიუსელიდან ჩვენ, სამწუხაროდ, მიჩვეულები ვართ რადიკალიზმის დაფინანსებას და მათი მხრიდან ისეთი ექსტრემისტული ჯგუფების დაფინანსებას, რომლებიც საქართველოში რევოლუციური პროცესების განვითარების ავანგარდში დგანან ხოლმე. ასეთი ცუდი რეპუტაციით რომ სარგებლობენ, კითხვის ნიშნები დატოვეს.

ნორვეგიის ახალმა ელჩმა პირდაპირ ფარული შეხვედრა ჩაატარა ზურა ჯაფარიძესთან და ნიკა გვარამიასთან, რომლებიც მართლა გამოირჩევიან იმ რადიკალურ ოპოზიციაშიც თავიანთი სხვა ტიპის რადიკალიზმით. ეს ფონდები ასეთი ტიპის მუშაობას აგრძელებენ, რაც ძალიან სამწუხაროა. ჩვენ არაფერი გამოგვეპარება, ყველაფერზე ვფლობთ ინფორმაციას, ყველაფერზე იქნება რეაგირება კანონის ფარგლებში, თუმცა ასეთი ქმედებებით კიდევ უფრო იზიანებენ საკუთარ რეპუტაციას საქართველოში.

ეს ყველაფერი მხოლოდ ერთ რამეს ემსახურება, რომ ეს პოლიტიკური აქტორები ცდილობენ პოლარიზაციის გაღრმავებას საქართველოში, ცდილობენ ემოციურად დაზიანებული ჩვენი თანამოქალაქეების გრძნობებზე თამაშს და მათთვის იმის სწავლებას, რომ თითქოს თავისუფლებისთვის ბრძოლა - არ არის ტერორიზმი, როგორც ჩვენ ვიხილეთ, მაგალითად, „ფრანკლინის კლუბი“. ეს ყველაფერი ძალიან სამწუხაროა, ჩვენ კონკრეტულ ნაბიჯებს ვდგამთ, რომ ეს ფაშიზმი საქართველოში დასრულდეს“, - აღნიშნა ლევან მაჭავარიანმა.

ბახმაროში გამართულ სემინარს, რომელიც ევროსაბჭოს მხარდაჭერით გაიმართა, აუდიტის სამსახური შეისწავლის.

18 სექტემბერს ბახმაროში არმაზ ახვლედიანის ორგანიზებულ საგანმანათლებლო სემინარზე სამოქალაქო საკითხებს განიხილავდნენ. გრანტების შესახებ კანონის თანახმად, ასეთ შემთხვევაში საქართველოს მთავრობის თანხმობაა საჭირო.