ირაკლი ქადაგიშვილი „კორძის“ კონცერტის დაფინანსებაზე: ეს არის „ქართული ოცნების“ ამომრჩევლის შეურაცხყოფა - ამ კლიპის ავტორს ერთხელაც არ ჰქონია იმის მცდელობა ეთქვა, რომ ეს მის ცხოვრებაში არ იყო საუკეთესო მოვლენა

თავიანთ მრევლს თუ აგენტურას არ ტოვებენ უყურადღებოდ. ეუბნებიან, რომ მიუხედავად „სირთულეებისა“, ჩვენ შევეცდებით, რომ თქვენ გვერდით დაგიდგეთ, - განაცხადა გადაცემაში „EURO ანატომია“ რეგიონული პოლიტიკისა და თვითმმართველობის საპარლამენტო კომიტეტის თავმჯდომარემ ირაკლი ქადაგიშვილმა მუსიკოს „კორძის“ კონცერტის დაფინანსებასთან დაკავშირებით.

მისივე თქმით, ეს არის „ქართული ოცნების“ ამომრჩევლის შეურაცხყოფა.

„აქ მხოლოდ იმაზე არ არის საუბარი, რომ ეს არის „ქართული ოცნების“ ამომრჩევლის შეურაცხყოფა. ზოგადად როგორ წარმოგიდგენიათ თქვენ, რომ ევროკავშირი და დანია, რომელთაც ჰუმანურობაზე, კაცთმოყვარეობაზე, ეთიკის უმაღლეს ნორმებზე, გამოხატვის კორექტულობაზე და ა.შ. აქვთ თავიანთ ქვეყანაში დიდი პრეტენზიები და აქ გეუბნებიან, რომ პირდაპირ გინებით დაწერილ კლიპს და მის ავტორს ჩვენ დავაფინანსებთ და ამით კიდევ ერთხელ გავაპიარებთ.

ამიტომ აქ პოლიტიკას რომ თავი დავანებოთ, ადამიანურ დონეზე მიუღებელია ასეთი რაღაცის წახალისება და დაფინანსება იმ შემთხვევაში, როდესაც ამ კლიპის ავტორს ერთხელაც არ ჰქონია იმის მცდელობა ეთქვა, რომ ეს მის ცხოვრებაში არ იყო საუკეთესო მოვლენა. ამ აქციის დაფინანსებას პოლიტიკის გარეშეც არანაირი გამართლება არ აქვს“, - აღნიშნა ქადაგიშვილმა.

როგორც ცნობილია, მუსიკოს „კორძის“ კონცერტი, რომელიც 26 სექტემბერს იყო დაგეგმილი, გაუქმდა.