აშშ-ის პრეზიდენტის წარმომადგენლები: უკრაინის შესახებ სამშვიდობო მოლაპარაკებების შემდეგ რაუნდში ევროპული მხარეც უნდა ჩაერთოს
მსოფლიო

GettyImages
აშშ-ის პრეზიდენტის წარმომადგენლებმა, სტივ უიტკოფმა და ჯარედ კუშნერმა, იმედი გამოთქვეს, რომ რუსეთის მიერ უკრაინის წინააღმდეგ წამოწყებული ომის მოსაგვარებლად დაგეგმილი სამშვიდობო მოლაპარაკებების მომდევნო რაუნდში ევროპელი პარტნიორებიც ჩაერთვებიან.
უიტკოფი და კუშნერი მოსკოვში იმყოფებოდნენ, სადაც კრემლის ლიდერს, ვლადიმირ პუტინს შეხვდნენ. მხარეებმა განიხილეს უკრაინის საკითხზე აბუ-დაბიში გამართული მოლაპარაკებების ბოლო რაუნდი, რომელიც ყოველგვარი გარღვევის გარეშე დასრულდა.
მიუხედავად ამისა, მოსკოვიდან გამოფრენამდე გაკეთებულ განცხადებაში სტივ უიტკოფმა აღნიშნა, რომ გარკვეული პროგრესი მაინც იქნა მიღწეული.
„ვფიქრობ, პროგრესი მიღწეულია. ვფიქრობ, ეს დღეს დილით მოხდა. არავინ ფიქრობდა, რომ სამმხრივ მოლაპარაკებებს განვაახლებდით. მაგრამ ჩვენ ისინი განვაახლეთ. ახალი შეხვედრა უკვე დავნიშნეთ“, - განაცხადა უიტკოფმა.
მან ასევე დაადასტურა, რომ უკრაინის კონფლიქტის შესახებ შემდეგ მოლაპარაკებებში ევროპის წარმომადგენლებიც მიიღებენ მონაწილეობას.
„ისინი ჩვენი პარტნიორები არიან და მათი ჩართულობა ძალიან მნიშვნელოვანია“, - განუცხადა მან ჟურნალისტებს.
თავის მხრივ, ჯარედ კუშნერმა დასძინა, რომ შეხვედრები ძალიან ყოვლისმომცველი და დეტალური იყო: „ვფიქრობ, საერთო ჯამში, გვქონდა ძალიან ამომწურავი და დეტალური განხილვები ყველა იმ თემაზე, რომლებიც, ვიმედოვნებ, მომდევნო მრავალმხრივი მოლაპარაკებების საფუძველი გახდება“.





