ზელენსკი: უკრაინა და რუსეთი ტყვეთა გაცვლას ფორმულით „ათასი ათასზე“ ან „ათას ხუთასი ათას ხუთასზე“ განიხილავენ

უკრაინის პრეზიდენტმა, ვოლოდიმირ ზელენსკიმ განაცხადა, რომ აბუ-დაბიში მიმდინარე სამმხრივი მოლაპარაკებების ფარგლებში ტყვეთა მასშტაბურ გაცვლაზე ცდილობენ შეთანხმებას.

„დღეს განვიხილეთ გაცვლის შესაძლებლობა. საუბარია „ათასი ათასზე“ ან, შესაძლოა, „ათას ხუთასი ათას ხუთასზე“ - ანუ მასშტაბურ გაცვლაზე. სწორედ ამ დღის წესრიგით გაემგზავრებიან ამერიკელები რუსეთში“, - განაცხადა ზელენსკიმ.

პრეზიდენტის თქმით, პარალელურად, აბუ-დაბიში რუსულმა დელეგაციამ ტერიტორიების საკითხიც წამოაყენა.

„ბუნებრივია, ეს ლიდერების დონის საკითხია. ჩვენს მომლაპარაკებლებსაც ზუსტად ამის შესაბამისი მანდატი აქვთ“, - აღნიშნა უკრაინის ლიდერმა.