მერცი: სრულიად მიუღებელია, რომ მესამე ქვეყნები უკრაინის ბედს უკრაინის მონაწილეობის გარეშე განიხილავდნენ. ხოლო როდესაც უკრაინა მაგიდასთან არის, ევროპაც მაგიდასთან არის

გერმანიის კანცლერმა, ფრიდრიხ მერცმა განაცხადა, რომ დონალდ ტრამპის მიერ „დიდი ოცეულის“ სამიტზე რუსეთის პრეზიდენტის შესაძლო მიწვევის შემთხვევაში, შეხვედრაზე პირველ რიგში სწორედ უკრაინის საკითხი უნდა განიხილონ.

„თუ პრეზიდენტი ტრამპი რუსეთის პრეზიდენტის მიწვევას გადაწყვეტს, მაშინ, უპირველეს ყოვლისა, უკრაინა უნდა განიხილონ. ხოლო თუ უკრაინა განიხილება, მაშინ მოლაპარაკებების მაგიდასთან უკრაინის პრეზიდენტიც უნდა იჯდეს“, - აღნიშნა მერცმა.

გერმანიის მთავრობის ხელმძღვანელის თქმით, სრულიად მიუღებელია მესამე ქვეყნების მიერ უკრაინის ბედის გადაწყვეტა თავად უკრაინის ჩართულობის გარეშე.

„ჩემი თვალსაზრისით, სრულიად მიუღებელია, რომ მესამე ქვეყნები უკრაინის ბედს უკრაინის მონაწილეობის გარეშე განიხილავდნენ. ხოლო როდესაც უკრაინა მაგიდასთან არის, ევროპაც მაგიდასთან არის“, - განაცხადა გერმანიის კანცლერმა.