საბერძნეთში განათლების დაფინანსებისა და ხელფასების გაზრდის მოთხოვნით ათასობით სტუდენტმა და მასწავლებელმა აქცია გამართა

საბერძნეთის სხვადასხვა ქალაქში ათასობით სტუდენტი და მასწავლებელი ქუჩაში გამოვიდა და განათლების სფეროსთვის სახელმწიფო დაფინანსების გაზრდა, უკეთესი ინფრასტრუქტურა და გადატვირთული საკლასო ოთახების პრობლემის მოგვარება მოითხოვა. ინფორმაციას Reuters-ი ავრცელებს.

სააგენტოს ცნობით, საბერძნეთში საპროტესტო აქციები ევროპაში ცხოვრების გაძვირებისა და საჯარო მომსახურების მდგომარეობის გამო მიმდინარე გამოსვლების ფონზე გაიმართა.

საბერძნეთის პოლიციის ინფორმაციით, ათენის ცენტრსა და გარეუბნებში გამართულ მშვიდობიან დემონსტრაციებში დაახლოებით 10 000 ადამიანი მონაწილეობდა, მათ შორის - სკოლის მოსწავლეები და უნივერსიტეტის სტუდენტები.

აქციები ქვეყნის სხვა ქალაქებშიც გაიმართა. მონაწილეებმა სოლიდარობა გამოუცხადეს საფრანგეთსა და ევროპის სხვა ქვეყნებში მიმდინარე საპროტესტო მოძრაობებს, რომელთა მონაწილეები ცხოვრების მზარდ ღირებულებასა და სკოლებში გაუარესებულ პირობებზე საუბრობენ.

პროტესტი დამატებით ზეწოლას ახდენს პრემიერ-მინისტრ კირიაკოს მიცოტაკისის მემარჯვენე-ცენტრისტულ მთავრობაზე, რომელსაც 2027 წელს არჩევნები ელის. საბერძნეთის მოსახლეობა კვლავ ებრძვის ხელფასების სტაგნაციას, მაღალ ქირასა და ენერგიის მზარდ ფასებს.

„საბერძნეთიდან საფრანგეთამდე - ჩვენ გვინდა საჯარო და უფასო განათლება!“, - სკანდირებდნენ დემონსტრანტები პარლამენტის შენობასთან. სტუდენტებმა ათენის ცენტრალურ სინტაგმას მოედანზე კარვები გაშალეს და ღამე იქ გაათენეს.

პროტესტის გამო შეფერხდა სახელმწიფო სკოლებისა და საავადმყოფოების მუშაობაც. ხელფასებისა და კადრების დეფიციტის წინააღმდეგ გაფიცვას დაწყებითი სკოლების მასწავლებლებისა და ექიმების ნაწილიც შეუერთდა.

განათლების მინისტრმა სოფია ზაქარარაკიმ აქციებამდე განაცხადა, რომ სტუდენტების მოთხოვნებს ისმენდა. მან აღიარა, რომ საცხოვრებლის მაღალი ღირებულება ბერძნულ ოჯახებს მძიმე ტვირთად აწვება. მინისტრის ინფორმაციით, ახალი სტუდენტური საცხოვრებლების მშენებლობისა და არსებული ინფრასტრუქტურის განახლებისთვის 733 მილიონ ევროზე მეტი ღირებულების პროექტები ხორციელდება.