მარტა კოსი: უკრაინა ევროკავშირის საერთო აგრარული პოლიტიკის ნაწილი გახდება, ხოლო თუ რა პირობებით, ამას მოლაპარაკებებზე განვიხილავთ - უკრაინის გაწევრიანება არ უნდა აისახოს უარყოფითად ევროკავშირის ფერმერებზე

სოფლის მეურნეობის საკითხებთან დაკავშირებული ბოლო, ჯერ კიდევ დახურული კლასტერის გახსნის მოლაპარაკებებისას, ევროკავშირმა შესაძლოა უკრაინის წევრობის სპეციფიკური პირობები განსაზღვროს.

ევროკომისიის მიერ მხარდაჭერილი ეს ინიციატივა გაფართოების საკითხებში ევროკომისარმა, მარტა კოსმა სამშაბათს, სტრასბურგში ევროკომისიის სხდომის დასრულების შემდეგ გააჟღერა.

ევროკომისარმა კოსმა, გაფართოების ახალი მიდგომების პროექტის წარდგენისას აღნიშნა, რომ უკრაინისთვის შესაძლოა შეთანხმდეს პირობები, რომლებიც სხვა კანდიდატი ქვეყნებისგან განსხვავებული იქნება.

„უკრაინის აგროსექტორის მასშტაბი, სტრუქტურა და მაღალი პროდუქტიულობა გვაძლევს საშუალებას, შემოგთავაზოთ მიზნობრივი გადაწყვეტილებების შემუშავება, რომლებიც მხოლოდ სენსიტიურ აგროპროდუქციას შეეხება“, - განაცხადა მან.

მიუხედავად იმისა, რომ ეს ცვლილებები მხოლოდ უკრაინას ეხება, კოსმა ხაზგასმით აღნიშნა, რომ ეს არ ნიშნავს წევრობის ცალკე ფორმატის შექმნას, თუმცა პირობები უკრაინისთვის ნამდვილად ექსკლუზიური იქნება.

„უკრაინა ევროკავშირის საერთო აგრარული პოლიტიკის ნაწილი გახდება, ხოლო თუ რა პირობებით - ამას მოლაპარაკებებზე განვიხილავთ. უკრაინის გაწევრიანება არ უნდა აისახოს უარყოფითად ევროკავშირის ფერმერებზე. ამავდროულად, გვსურს დავეხმაროთ უკრაინას ტრადიციულ საექსპორტო ბაზრებზე წვდომის აღდგენაში“, - დასძინა მან.

ევროკომისარს წინადადების დეტალები არ დაუკონკრეტებია, თუმცა აღნიშნა, რომ უკრაინასთან კონსულტაციები უკვე მიმდინარეობს.