ტრამპმა განაცხადა, რომ ავიაკომპანია Fly Dubai-ს თვითმფრინავზე მომხდარ თავდასხმაზე პასუხისმგებლად ირანს მიიჩნევს

აშშ-ის პრეზიდენტმა დონალდ ტრამპმა განაცხადა, რომ გასულ კვირას ავიაკომპანია Fly Dubai-ს თვითმფრინავზე მომხდარ თავდასხმაზე პასუხისმგებლად ირანს მიიჩნევს.

შეკითხვაზე, მიიჩნევს თუ არა, რომ მომხდარზე პასუხისმგებელი ირანია, ტრამპმა თეთრ სახლთან ჟურნალისტებს უპასუხა: „დიახ, მივიჩნევ“. თუმცა, აშშ-ის პრეზიდენტს არ დაუკონკრეტებია, რას ეფუძნება მისი ეს შეფასება.

მანამდე აშშ-ის ვიცე-პრეზიდენტმა, ჯეი დი ვენსმა განაცხადა, რომ მას ჯერ არ უნახავს საბოლოო და დამაჯერებელი მტკიცებულებები, რომლებიც ირანს აღნიშნულ თავდასხმასთან პირდაპირ დააკავშირებდა.

ისრაელის უსაფრთხოების სამსახურების წარმომადგენლები ამ ეტაპზე ვარაუდობენ, რომ ომანელმა მეორე პილოტმა, რომელიც ისრაელის მოქალაქეებით სავსე თვითმფრინავის გატაცებასა და ჩამოგდებას ცდილობდა, დამოუკიდებლად იმოქმედა.

ისრაელის პრემიერ-მინისტრმა ბენიამინ ნეთანიაჰუმაც არაერთხელ აღნიშნა, რომ ჯერ ნაადრევია იმის მტკიცება, დგას თუ არა ირანი ამ თავდასხმის უკან.

ჟურნალისტებმა ტრამპს ასევე ჰკითხეს, არის თუ არა იგი მზად ირანთან პირდაპირი მოლაპარაკებებისთვის.

„დიახ, ყოველთვის. ჩვენ ყოველთვის დიპლომატიურები ვართ“, - განაცხადა აშშ-ის პრეზიდენტმა.