საფრანგეთში მიმდინარე სკოლის მოსწავლეების საპროტესტო აქციებზე 1949 ადამიანი დააკავეს

საფრანგეთში მიმდინარე საპროტესტო აქციებზე 1949 ადამიანი დააკავეს. დაშავდა 305 პოლიციელი. შინაგან საქმეთა სამინისტროს მონაცემებით, საპროტესტო აქციებმა ჯამში 1027 ლიცეუმი დააზარალა. აქციებს, სულ მცირე, 30 უნივერსიტეტი შეუერთდა.

საფრანგეთის განათლების მინისტრმა, ედუარ ჟეფრემ განაცხადა, რომ სკოლის მოსწავლეების საპროტესტო აქციების გამო 400-ზე მეტი სკოლა დაიხურება, გაკვეთილები კი დისტანციურად ჩატარდება. პროტესტის ფონზე რამდენიმე სკოლაში ხანძარი გაჩნდა.

ამასთან, მარსელსა და სტრასბურგში საზოგადოებრივი ტრანსპორტის მუშაობაც შეწყდა. მიზეზად ვანდალიზმი, ძალადობის მუქარა და აქციის მონაწილეების გადაადგილებისთვის ხელის შეშლის აუცილებლობა დასახელდა.

მიმდინარე არეულობებსა და ვანდალიზმის ფაქტებს ნიცის მერი გამოეხმაურა და განაცხადა რომ ანაზღაურება ვანდალი მოზარდების მშობლებს უნდა დაეკისროთ.

საფრანგეთში მოსწავლეთა საპროტესტო აქციები გაფართოვდა და ქვეყნის მასშტაბით 400-ზე მეტი სკოლა მოიცვა. რამდენიმე მსხვილ ქალაქში აქციები პოლიციასთან შეტაკებებში გადაიზარდა. უფროსკლასელები სკოლებში სასწავლო პირობებს, გადატვირთულ კლასებსა და პედაგოგების ნაკლებობას აპროტესტებენ.