გერმანიის საგარეო საქმეთა მინისტრმა ევროკავშირის წევრ ქვეყნებს მოუწოდა, შეასრულონ დასავლეთ ბალკანეთისთვის მიცემული გაფართოების პირობა

გერმანიის საგარეო საქმეთა მინისტრმა, იოჰან ვადეფულმა ევროკავშირის წევრ ქვეყნებს მოუწოდა, შეასრულონ დასავლეთ ბალკანეთისთვის მიცემული გაფართოების პირობა. მან გააფრთხილა პარტნიორები, რომ სასწორზე უშუალოდ ბლოკისა და მისი რეგიონული გავლენის სანდოობა დგას.

„ევროკავშირის გაფართოების პროცესში გარდამტეხ გზაჯვარედინზე ვართ“, - განუცხადა ვადეფულმა ჟურნალისტებს მონტენეგროში, „ბერლინის პროცესის“ ფარგლებში გამართული შეხვედრის შემდეგ.

აღნიშნულ ფორმატში ევროკავშირისა და დასავლეთ ბალკანეთის წარმომადგენლები რეგიონის ეკონომიკურ ინტეგრაციასა და ინფრასტრუქტურულ პროექტებს განიხილავენ.

გერმანიის საგარეო უწყების ხელმძღვანელის თქმით, ევროკავშირმა ჯერ კიდევ 2003 წლის თესალონიკის სამიტზე განაცხადა, რომ დასავლეთ ბალკანეთის ადგილი ბლოკში იყო.

საკუთარი ქვეყნის ძალისხმევის კრიტიკული შეფასებისას მან დასძინა, რომ ყოფილმა კანცლერმა, ანგელა მერკელმა პროცესის დაჩქარების მიზნით „ბერლინის პროცესი“ 2014 წელს წამოიწყო, თუმცა მას შემდეგ 12 წელი გავიდა და ხელშესახები წარმატებისთვის ჯერ კიდევ არ მიუღწევიათ.

„ჩვენ პირობა ვერ შევასრულეთ. ყველას მოვუწოდებ, დავამტკიცოთ, რომ თესალონიკის დაპირება რეალური იყო - დავანახოთ მათ, რომ ჩვენ სანდოები ვართ“, - განაცხადა მინისტრმა.

ვადეფულმა ყურადღება გაამახვილა „გეოპოლიტიკურ მოწინააღმდეგეებსა და კონკურენტებზეც“, რომლებიც რეგიონში გავლენის მოსაპოვებლად ევროკავშირს ეცილებიან - რაც პირდაპირი მინიშნებაა რუსეთსა და ჩინეთზე.