POLITICO: უკრაინის საბრძოლო ბიუჯეტი ყველაზე ცუდ მომენტში იწურება

ვლადიმირ პუტინი უკრაინაზე ზეწოლას აძლიერებს - დრონებისა და რაკეტების უწყვეტი ტალღებით იგი ანადგურებს ქალაქებს, ქარხნებს, ხიდებსა და პორტებს, - წერს გამოცემა POLITICO სტატიაში სათაურით „უკრაინის საბრძოლო ბიუჯეტი ყველაზე ცუდ მომენტში იწურება“.

საზენიტო რაკეტების ნაკლებობის ფონზე, კიევს უჭირს რუსეთის სულ უფრო მომრავლებული რეაქტიული დრონების ჩამოგდება, თუმცა უკრაინის პრობლემები ამით არ მთავრდება.

პრემიერ-მინისტრმა, სერგეი კორეცკიმ ამ კვირაში ჟურნალისტები გააფრთხილა, რომ წელს უკრაინის თავდაცვის დაფინანსებაში 27 მილიარდი დოლარის დეფიციტია.

კიევი დაახლოებით 7 მილიარდის დაფარვას შიდა რესურსებით გეგმავს, დარჩენილი თანხის მოძიებას კი პარტნიორებისგან ელის. ევროკავშირის დაფინანსების ნაწილი კვლავ იმ რეფორმებზეა მიბმული, რომლებიც კიევმა თანხის მისაღებად უნდა გაატაროს, სხვა მოკავშირეებს კი დარჩენილი დანაკლისი ჯერ არ შეუვსიათ.

გასულ ღამეს რუსეთმა ფართომასშტაბური შეტევა განახორციელა - 190-ზე მეტი რაკეტითა და დრონით. დარტყმის მთავარი სამიზნე ენერგეტიკული ობიექტები გახდა, რის გამოც კიევი უშუქოდ დარჩა.

თავდასხმის ფონზე, უკრაინის პრეზიდენტმა, ვოლოდიმირ ზელენსკიმ პარტნიორებს საჰაერო თავდაცვის საშუალებების გაძლიერებისკენ ხელახლა მოუწოდა: „თითოეული საზენიტო რაკეტა რეალურად სიცოცხლის გადამრჩენია. ზამთრის მოახლოებასთან ერთად, ამ ტიპის დაცვის საჭიროება სულ უფრო იზრდება. ჩვენი ვალია, გავაკეთოთ მაქსიმუმი, რათა რუსეთის ბალისტიკურმა და დრონებით განხორციელებულმა ტერორისტულმა სტრატეგიამ მიზანს ვერ მიაღწიოს“.