The Times of Israel: ისრაელის ტრანსპორტის მინისტრი Fly Dubai-ს რეისების შეჩერებას და არაბთა გაერთიანებულ საამიროებთან გაფორმებული საავიაციო შეთანხმების შესწავლას ითხოვს

ისრაელის ტრანსპორტის მინისტრი მირი რეგევი ქვეყნის მიმართულებით ავიაკომპანია Fly Dubai-ს ყველა რეისის შეჩერებას ითხოვს. გადაწყვეტილება დუბაიდან თელ-ავივისკენ მიმავალ თვითმფრინავში მომხდარ დილის ინციდენტს უკავშირდება, იუწყება The Times of Israel-ი.

ისრაელური მედიის ინფორმაციით, რეგევმა ასევე სამოქალაქო ავიაციის უწყებას სთხოვა, გამოიძიოს, დაარღვია თუ არა არაბთა გაერთიანებულმა საამიროებმა ისრაელთან გაფორმებული საავიაციო შეთანხმება.

შეთანხმების თანახმად, ისრაელში დაშვების უფლება მხოლოდ იმ ქვეყნების პასპორტის მფლობელ პილოტებს აქვთ, რომლებსაც ისრაელთან დიპლომატიური ურთიერთობები აქვთ.

გავრცელებული, თუმცა ამ დროისთვის დაუდასტურებელი ინფორმაციით, Fly Dubai-ს რეისის მეორე პილოტმა, რომელიც ზოგიერთი ცნობით ომანის მოქალაქეა, კაპიტანს დანით მიაყენა ჭრილობები და თვითმფრინავის ჩამოგდება სცადა, თუმცა მგზავრებმა მისი შეჩერება შეძლეს.

ისრაელსა და ომანს დიპლომატიური ურთიერთობები არ აქვთ.