BBC: საფრანგეთის სკოლებში მიმდინარე მოსწავლეების საპროტესტო აქციების გამო 400-ზე მეტი ადამიანი დააკავეს, რომელთა უმეტესობა არასრულწლოვანია

საფრანგეთში ქვეყნის მასშტაბით სკოლებში მიმდინარე მოსწავლეების საპროტესტო აქციების გამო 400-ზე მეტი ადამიანი დააკავეს, მათი უმეტესობა არასრულწლოვანია. ინფორმაციას BBC საფრანგეთის შინაგან საქმეთა მინისტრზე ლორან ნიუნესზე დაყრდნობით ავრცელებს.

საპროტესტო გამოსვლები, რომლებიც პარიზში დაიწყო, გადატვირთულ კლასებს, მასწავლებლების დეფიციტსა და განათლების სისტემაში არსებულ სხვა პრობლემებს უკავშირდება. მოსწავლეები უკვე რამდენიმე დღეა სკოლების შესასვლელებს ბლოკავენ.

ოფიციალური ინფორმაციით, გუშინ გამართულ საპროტესტო აქციებზე სულ მცირე 10 მასწავლებელი, რამდენიმე მოსწავლე და სამართალდამცველების 48 წარმომადგენელი დაშავდა. საფრანგეთის განათლების სამინისტროს ცნობით, საპროტესტო მოძრაობამ სულ მცირე 400 სკოლას შეუქმნა პრობლემა.

აქციის მონაწილეებმა ნაგვის ურნებს ცეცხლი წაუკიდეს და ავტობუსის გაჩერებები დააზიანეს.

„ჩვენ აქ იმისთვის ვართ, რომ ჩვენი სათქმელი მივიტანოთ. ჩვენ აქ არ ვართ იმისთვის, რომ უმიზეზოდ ყველაფერი დავანგრიოთ. უბრალოდ, გვინდა ვთქვათ, რომ განათლების სისტემა მთლიანად მოშლილია. თითოეულ კლასში 34 მოსწავლეა და ეს პრაქტიკულად შეუძლებელია. მასწავლებლები გადატვირთულები არიან“, - განაცხადა 16 წლის მოსწავლემ.

საფრანგეთის განათლების მინისტრმა ედუარ გეფრემ სოციალურ ქსელ X-ზე განაცხადა, რომ მოსწავლეებს პროტესტის გამოხატვის უფლება აქვთ, თუმცა ძალადობის შესახებ გავრცელებულ ცნობებს მან „დაუშვებელი“ უწოდა.

საფრანგეთის შინაგან საქმეთა მინისტრმა განაცხადა, რომ დაკავებულია 440 ადამიანი. მისი თქმით, საბოლოო მონაცემი ჯერ ცნობილი არ არის, თუმცა არსებული ინფორმაციით, დაკავებულთა დაახლოებით ორი მესამედი პოლიციის განყოფილებებში გადაიყვანეს.

ფრანგული მედიის ცნობით, აქციის მონაწილეები პოლიციას სხვადასხვა საგნებს ესროდნენ, რასაც სამართალდამცველებმა ხელკეტებისა და ცრემლსადენი გაზის გამოყენებით უპასუხეს.