მარტა კოსი უკრაინის ხელისუფლებას: გაატარეთ შეთანხმებული რეფორმები, რათა ჩვენც შევძლოთ ფინანსური მხარდაჭერის გაგრძელება

ბრიუსელში აცხადებენ, რომ უკრაინის მთავრობა, უმაღლესი რადა და სხვა ინსტიტუტები უნდა გაერთიანდნენ იმ რეფორმების განსახორციელებლად, რომლებიც აუცილებელია ქვეყნის ევროპული მომავლისთვის და ევროპული დაფინანსების მისაღებად.

ამის შესახებ გაფართოების საკითხებში ევროკომისარმა, მარტა კოსმა ბრიუსელში, უკრაინის დონორთა პლატფორმის შეხვედრაზე განაცხადა, რომელსაც უკრაინის ფინანსთა მინისტრი სერგეი მარჩენკოც ესწრებოდა.

კოსმა ხაზგასმით აღნიშნა, რომ ევროკავშირის მიდგომით, დაფინანსება და რეფორმები გვერდიგვერდ უნდა მიდიოდეს. ევროკომისრის თქმით, ომი იმაზე დიდხანს გრძელდება, ვიდრე ვინმე ისურვებდა, უკრაინის საჭიროებები დაფინანსებაზე კი კვლავ მნიშვნელოვანი რჩება. მან აღნიშნა, რომ ევროკავშირი თავის ვალდებულებებს ასრულებს და იგივეს ელის კიევისგანაც.

მისივე განცხადებით, რეფორმების განხორციელებაში მიღწეული პროგრესი უკრაინას საშუალებას მისცემს, Ukraine Facility-ს ფარგლებში კიდევ 2.9 მილიარდი ევრო მიიღოს.

„ეს არის უკრაინის მიერ განხორციელებული მნიშვნელოვანი რეფორმების აღიარება. წელს ევროკავშირის მხრიდან კვლავ ხელმისაწვდომია მნიშვნელოვანი დაფინანსება. ჩვენი გზავნილი უკრაინელი მეგობრებისადმი ნათელია: გაატარეთ შეთანხმებული რეფორმები, რათა ჩვენც შევძლოთ ფინანსური მხარდაჭერის გაგრძელება“, - განაცხადა მარტა კოსმა.

ევროკომისარმა დასძინა, რომ რეფორმები ქმნის ნდობას და ინვესტორებს უკრაინის მომავალში რწმენას უმტკიცებს. გარდა ამისა, მყარი ინსტიტუტები, დამოუკიდებელი სასამართლო სისტემა, კანონის უზენაესობა და ანტიკორუფციული სისტემა მხოლოდ ევროკავშირში გაწევრიანებისთვის კი არა, უკრაინის უსაფრთხოების არქიტექტურის ნაწილიცაა.

კოსი მიესალმა რეფორმების დინამიკის განახლებას პრემიერ-მინისტრის ხელმძღვანელობით, თუმცა ხაზი გაუსვა ქვეყნის შიგნით ერთიანობის აუცილებლობას.