ISW: პუტინმა შესაძლოა ზამთარში შორ მანძილზე დარტყმების სტრატეგიას მიმართოს და ენერგოობიექტებზე შეტევების შეწყვეტას არ დათანხმდეს

ომის შესწავლის ინსტიტუტის (ISW) შეფასებით, რუსეთის პრეზიდენტი, ვლადიმირ პუტინი, სავარაუდოდ, არ დათანხმდება ენერგეტიკულ სექტორზე თავდასხმების შეზღუდვას, რადგან ზამთარში, შესაძლოა, აქცენტი შორ მანძილზე მასირებულ დარტყმებზე გააკეთოს.

25 სექტემბერს პუტინმა განაცხადა, თითქოს უკრაინა ენერგოინფრასტრუქტურაზე შორ მანძილზე დარტყმების შეწყვეტას ითხოვდა. მან აღნიშნული საკითხი რუსული შეტევების მასშტაბებსა და მოდერნიზებული „გერანის“ ტიპის დრონების გამოყენებას დაუკავშირა. რუსეთის ლიდერის თქმით, უკრაინამ „უნდა იგრძნოს“ საპასუხო დარტყმები და გააცნობიეროს, რომ მისი „პროვოკაციული“ ქმედებები ვითარებას ამწვავებს. კრემლთან დაახლოებული სამხედრო ბლოგერებიც მიიჩნევენ, რომ უკრაინის ეკონომიკურ და ინდუსტრიულ პოტენციალზე შეტევები კიევის მოლაპარაკებების პოზიციას დაასუსტებს.

ISW აღნიშნავს, რომ 2024 წლის ივნისში პუტინმა ჩამოაყალიბა „გამარჯვების თეორია“, რომლის მიხედვითაც რუსული არმიის ეტაპობრივ წინსვლას უკრაინის თავდაცვა უნდა გაეტეხა, რის გამოც კიევი იძულებული გახდებოდა, მოსკოვის მოთხოვნებს დათანხმებოდა.

თუმცა, 2026 წელს რუსეთმა სასურველ შედეგს ვერ მიაღწია. ექსპერტების შეფასებით, მარტის შემდეგ რუსულ ძალებს არსებითი ტერიტორიული წინსვლა არ ჰქონიათ, ხოლო უკრაინის არმიამ წარმატებული კონტრშეტევითი ოპერაციები ჩაატარა კუპიანსკის, ალექსანდრივკასა და ლიმანის მიმართულებებზე.

ISW ვარაუდობს, რომ ფრონტზე არსებული რეალური ვითარება კრემლს ომისადმი მიდგომის გადახედვას აიძულებს - რუსეთმა შესაძლოა სულ უფრო მეტად დაუჭიროს მხარი შორ მანძილზე დარტყმებს, რათა უკრაინა კაპიტულაციაზე არა მხოლოდ ფრონტის ხაზზე ზეწოლით, არამედ ზურგსა და კრიტიკულ ინფრასტრუქტურაზე შეტევებით დაიყოლიოს.

სტრატეგიის შესაძლო ცვლილების გამო, ISW პესიმისტურად აფასებს „ენერგეტიკული ზავის“ პერსპექტივას. ანალიტიკოსები მიიჩნევენ, რომ პუტინი ნაკლებად სავარაუდოა დათანხმდეს აშშ-ისა და უკრაინის წინადადებას ენერგოინფრასტრუქტურაზე დარტყმების შეწყვეტის შესახებ, რადგან ასეთი შეთანხმება პირდაპირ შეზღუდავს რუსეთის დაგეგმილ კამპანიას. გარდა ამისა, ISW 2026-2027 წლების ზამთრის კამპანიის დასრულებამდე მოლაპარაკებებში სერიოზულ პროგრესს ან კრემლის მხრიდან დათმობებს ნაკლებად სავარაუდოდ მიიჩნევს.