გერმანიის საგარეო საქმეთა მინისტრი: G20-ის სამიტში ვლადიმირ პუტინის მონაწილეობა შესაძლოა გახდეს სერიოზული მოლაპარაკებების დასაწყისი

გერმანიის საგარეო საქმეთა მინისტრმა, იოჰან ვადეფულმა განაცხადა, რომ G20-ის შეხვედრაში რუსეთის პრეზიდენტის, ვლადიმირ პუტინის მონაწილეობა შესაძლოა გახდეს „სერიოზული მოლაპარაკებების“ დასაწყისი უკრაინაში რუსეთის სრულმასშტაბური შეჭრის დასასრულებლად.

აშშ-ის პრეზიდენტმა, დონალდ ტრამპმა რუსეთის პრეზიდენტი მიამიში დეკემბერში დაგეგმილ G20-ის სამიტზე მიიწვია.

ბევრმა ლიდერმა, მათ შორის იტალიის პრემიერ-მინისტრმა, ჯორჯია მელონიმ და ევროკავშირის მთავარმა დიპლომატმა, კაია კალასმა აღნიშნულ მიწვევასთან დაკავშირებით სერიოზული უკმაყოფილება და ეჭვები გამოთქვეს.

თუმცა, იოჰან ვადეფულმა ოტავაში თავის კანადელ კოლეგასთან გამართული პრესკონფერენციის დროს უფრო ოპტიმისტური პოზიცია დააფიქსირა.

ეს მიწვევა „ნამდვილად იქნება ლაკმუსის ტესტი, მათ შორის ვლადიმირ პუტინისთვის, რათა აწარმოოს მოლაპარაკებები. ასე რომ, ამგვარი შესაძლებლობებით ადამიანმა უნდა ისარგებლოს“, - განაცხადა მან. - „ჩვენ არაერთხელ მოვუწოდეთ რუსეთის მთავრობასა და ვლადიმირ პუტინს მოლაპარაკებების მაგიდასთან დაჯდომისკენ. და თუ ასეთი შესაძლებლობა არსებობს, შესაძლოა ეს მაინც იყოს სერიოზული მოლაპარაკებების დასაწყისი“.

მან დასძინა, რომ შინაარსიანი საუბრის წინაპირობა მოლაპარაკებების მსვლელობისას ცეცხლის შეწყვეტის რეჟიმის მოქმედება იქნება.