ლატვიამ უსმანოვისა და ფრიდმანისთვის სანქციების მოხსნა დაბლოკა

ევროკავშირის ელჩები რუსეთის წინააღმდეგ პერსონალური სანქციების გახანგრძლივების საკითხს კვლავ განიხილავენ. მხარეები სანქციების სიიდან რუსი ბიზნესმენების - ალიშერ უსმანოვისა და მიხაილ ფრიდმანის ამოღების საკითხზე ვერ თანხმდებიან. მათთვის შეზღუდვების მოხსნას საფრანგეთი და სლოვაკეთი ითხოვს. ელჩების შეთანხმება ლატვიამ დაბლოკა. ქვეყნის პრემიერ-მინისტრმა ანდრის კულბერგსმა განმარტა, რომ ევროპამ არ უნდა დაუშვას სანქციების შერბილება და რუსეთზე წნეხი უნდა გააძლიეროს.

„ვითარება ცალსახა არ არის. სანქციების მოქმედების ვადაზე შეთანხმებას, ევროკავშირის 27-ვე წევრი სახელმწიფოს თანხმობა სჭირდება. თუ დადგენილი ვადის ამოწურვამდე შეთანხმება ვერ მიიღწევა, საფრთხის ქვეშ დადგება სანქციების გაგრძელება მთლიან სიასთან მიმართებით და არა მხოლოდ ალიშერ უსმანოვისა და მიხეილ ფრიდმანის ნაწილში“, - განაცხადა მან.

Reuters-ი წერდა, რომ ევროკავშირის წევრი ქვეყნების ელჩები 21 სექტემბერს შეთანხმდნენ, რომ ალიშერ უსმანოვსა და მიხეილ ფრიდმანს სანქციებს მოუხსნიან, თუ ევროკავშირის არცერთი სახელმწიფო ამის წინააღმდეგ პოზიციას არ დააფიქსირებს.

14 სექტემბერს ევროკავშირის ელჩებმა, სანქცირებული პირების სიის მოქმედების გაგრძელება მხოლოდ ერთი კვირით შეათანხმეს. აღნიშნული სია ყოველ ექვს თვეში ახლდება, რასაც გაერთიანების 27-ვე ქვეყნის თანხმობა სჭირდება.

თუმცა, ამჯერად სანქციების გაგრძელება რუს ბიზნესმენებთან დაკავშირებული შეზღუდვების გამო წარმოქმნილი აზრთა სხვადასხვაობის გამო ვერ მოხერხდა. უსმანოვისთვის სანქციების მოხსნას მხარი სლოვაკეთმა და საფრანგეთმა დაუჭირა, ფრიდმანისთვის შეზღუდვების გაუქმებას კი სლოვაკეთმა, უნგრეთმა და ლუქსემბურგმა.