ლევან მეხუზლა: ითქვა, დასეტყვილ ყურძენს იბარებდით 80 თეთრადო, ამ ყველაფერმა გააჩინა ის მოტივაცია, რომ ჰექტრობით ვენახების მოვლა ხდებოდა ისე, რომ რაც შეიძლება, მეტი მოსავალი მიგვეღო. ამან საბოლოოდ მიგვიყვანა იქამდე, რომ გვაქვს ბევრი დაბალხარისხიანი, ან საშუალო ხარისხიანი ყურძენი

როგორ შეიძლება ერთ ქვაბში მოიხარშოს მევენახე, რომელსაც აქვს 1 ჰექტრამდე ვენახი, რომელსაც აქვს 5 ჰექტრამდე, რომელსაც 20 ჰექტრამდე და რომელსაც აქვს 20 ჰექტარი და ზევით. დავაშავეთ ჩვენ მცირე მევენახეებმა? - ამ კითხვით მევენახე ლია ბაზიერაშვილმა, გადაცემა „ღაი ეთერის“ სტუმრებს მიმართა.

მევენახე სახელმწიფოს სთავაზობს, მევენახეებს საკუთრებაში არსებული ვენახის ფართობის მიხედვით, დიფერენცირებულად დაეხმაროს.

პასუხად, ღვინის ეროვნული სააგენტოს თავმჯდომარემ განაცხადა, რომ ეს შეთავაზება მის კომპეტენციას სცდება და განმარტა, ყურძნის აქამდე არსებულმა ფასმა მევენახეებს რა ტიპის მოტივაცია გაუჩინა.

„მინდა, კიდევ ერთხელ ვეცადო და რამენაირად ავხსნა. ითქვა, დასეტყვილ ყურძენს იბარებდით 80 თეთრადო, ამ ყველაფერმა გააჩინა ის მოტივაცია, რომ ჰექტრობით ვენახები ისხვლებოდა ისე, მთელი წლის განმავლობაში ისე ხდებოდა მოვლა, რომ რაც შეიძლება მეტი მოსავალი მიგვეღო. ამან საბოლოო ჯამში მიგვიყვანა იქამდე, რომ გვაქვს ბევრი დაბალხარისხიანი, ან საშუალო ხარისხიანი ყურძენი“, - განაცხადა ლევან მეხუზლამ.